અમદાવાદ : કોમનવેલ્થ ગેમ્સને લઈને મોટા સમાચાર સામે આવ્યા છે.કોમનવેલ્થ ગેમ્સ–2030નું આયોજન અમદાવાદમાં કરાવવા માટે રાજ્ય સરકારે તૈયારી તેજ કરી છે.જેમાં રાજ્ય સરકાર અને AMC અધિકારીઓ સ્કોટલેન્ડ જવા રવાના થઈ ગઈ છે.જેમાં 2030માં આયોજીત કોમનવેલ્થ ગેમ્સ માટે પ્રેઝન્ટેશન રજૂ કરવામાં આવશે.
પ્રાપ્ત રિપોર્ટ મુજબ, 24 નવેમ્બરથી 27 નવેમ્બર સુધી સ્કોટલેન્ડના ગ્લાસગો ખાતે કોમનવેલ્થ સ્પોર્ટસની જનરલ એસેમ્બલી મળનારી છે. જેમાં કોમનવેલ્થ ગેમ્સ- 2030નું અમદાવાદ ખાતે આયોજન કરવા માટે ગેમ્સ પ્રપોઝલનું પ્રેઝન્ટેશન કરવામાં આવનાર છે. પ્રેઝન્ટેશન પછી જનરલ એસેમ્બલી દ્વારા મતદાન કરવામાં આવશે અને અમદાવાદને યજમાન શહેર તરીકે પૃષ્ટી આપતો હોસ્ટ કોલબ્રેશન એગ્રીમેન્ટ પર હસ્તાક્ષર થવાની સંભાવના છે. જેના અનુસંધાને રાજ્ય સરકાર દ્વારા 24થી 27 નવેમ્બર દરમિયાન ડેપ્યુટી સી.એમ. હર્ષ સંઘવી, રાજ્યકક્ષાના રમતગમત મંત્રી જયરામ ગામીત, સ્પોર્ટસના પ્રિન્સીપાલ સેક્રેટરી અશ્વિની કુમાર અને અમદાવાદ મ્યુનિ. કમિશનર બંછાનિધી પાનીને ગ્લાસગો મોકલવા મંજુરી આપી છે.
અમદાવાદમાં કોમનવેલ્થ ગેમ્સ-2030 યોજાશે તે લગભગ નકકી છે. આમ છતાં ગ્લાસગો ,સ્કોટલેન્ડ ખાતે 24 થી 27નવેમ્બર દરમિયાન યોજાનારી કોમનવેલ્થ ગેમ્સની જનરલ એસેમ્બલીમાં 26 નવેમ્બર-૨૫ના રોજ અંતિમ નિર્ણયની જાહેરાત થવાની સંભાવના વ્યકત કરાઈ છે. સાબરમતી રિવરફ્રન્ટ ખાતે કોમવેલ્થ-2030 ની યજમાની કરવાની તક મળશે તો રિવરફ્રન્ટ ખાતે ભવ્ય આતશબાજી કરવામા આવશે.
અમદાવાદ મ્યુનિ. કોર્પોરેશનની સ્ટેન્ડિંગ કમિટીની બેઠકમાં આ અંગે તાકીદનું કામ મુકવામાં આવ્યું હતું. જેમાં મ્યુનિ. કમિશનરને ગ્સાસગો ખાતે મોકલવા તથા તે અંગે આનુષાંગિક ખર્ચ મ્યુનિ. કોર્પોરેશને ભોગવવા તેમજ જરૂરી કાર્યવાહી કરવા માટેની સત્તા મ્યુનિ. કમિશનરને આપવા માટે સ્ટેન્ડિંગ કમિટી દ્વારા મંજુરી આપવામાં આવી છે.
અમદાવાદ શહેર કોમનવેલ્થ ગેમ્સનું યજમાન બનશે.નારણપુરા ખાતે આંતરરાષ્ટ્રીય કક્ષાનું સ્પોર્ટ્સ કોમ્પ્લેક્ષ તૈયાર કરવામાં આવ્યું છે.કોમનવેલ્થ ગેમ્સ માટે કેન્દ્રીય ગૃહ મંત્રી અમિત શાહે પણ સંકેત આપ્યા છે.