અમદાવાદ : અમદાવાદના દધીચિ બ્રિજ પરથી કૂદીને જીવનનો અંત લાવવાનો પ્રયાસ કરનાર એક યુવાનને મંગળવારેનો દિલધડક બચાવ કરી લેવાયો, યુવક બ્રિજની પાળી પર લગાવેલી જાળી ક્રોસ કરી નદીમાં કૂદવા જ જતો હતો. આ દરમિયાન હાજર લોકોએ તેને પકડી તાત્કાલિક ફાયરબ્રિગેડને જાણ કરી હતી, જોકે ફાયરબ્રિગેડ આવે ત્યાં સુધીમાં ત્યાંથી પસાર થતા એક JCBને હાજર લોકોએ બ્રિજની નજીક લાવી તેના પર ચડીને યુવકને ઉપર ખેંચી બચાવી લીધો હતો.
પ્રાપ્ત રિપોર્ટ મુજબ, શહેરના જુના વાડજ વિસ્તારમાં સાબરમતી નદી પર આવેલા દધીચિબ્રિજ ઉપર ગઈકાલે રાત્રે 8:45 વાગ્યાની આસપાસ એક યુવક બ્રિજની રેલિંગ ઉપર ચડીને બ્રિજ પરથી નદીમાં કૂદી આપઘાતનો પ્રયાસ કરવા જતો હતો. આ દરમિયાન બ્રિજ ઉપરથી પસાર થતા લોકોએ તે યુવકને તરત જ પકડી લીધો હતો.જોકે, તે છૂટવા માટે સંઘર્ષ કરી રહ્યો હતો.
આ દરમિયાન જ રાહદારીઓ દ્વારા ફાયરબ્રિગેડને જાણ કરવામાં આવી હતી. જોકે, ફાયરબ્રિગેડની ટીમને સ્થળ પર પહોંચવામાં મોડું થતાં રસ્તા પરથી પસાર થઈ રહેલા જેસીબી મશીનની મદદ લેવામાં આવી હતી. જેસીબીની મદદથી યુવકને બચાવવાનો પ્રયાસ કરવામાં આવ્યો હતો. ચાર યુવકો જેસીબી મશીન પર ચડી જાય છે અને યુવકને નીચે પડતાં રોકે છે.
અમદાવાદીઓ લોકોને મદદ કરવામાં હરહંમેશ આગળ હોય છે તે આ ઘટનાએ ફરી સાબિત કરી બતાવ્યું છે. આ યુવકને સહીસલામત રીતે બહાર કાઢી તેને નવું જીવન આપવામાં આવ્યું છે. આ ઘટનાનો વીડિયો સોશિયલ મીડિયામાં વાયરલ થઈ રહ્યો છે.