અમદાવાદ : રાજસ્થાનના માઉન્ટ આબુથી અમદાવાદ પરત ફરી રહેલા પ્રવાસીઓ અકસ્માત નડ્યો હતો. રવિવારે (21મી ડિસેમ્બર) સવારે માઉન્ટ આબુના જોખમી વળાંકો ઉતરી રહેલી એક ખાનગી લક્ઝરી બસ પલટી ખાઈ જતાં મોટી દુર્ઘટના સર્જાઈ છે. આ અકસ્માતમાં 24થી વધુ મુસાફરો ઇજાગ્રસ્ત થયા છે, જે પૈકી કેટલાકની હાલત ગંભીર હોવાનું જાણવા મળી રહ્યું છે.
પ્રાપ્ત રિપોર્ટ મુજબ, રાજસ્થાનના સિરોહી જિલ્લાના આબુરોડ વિસ્તારમાં રવિવારે એક ભયાનક માર્ગ અકસ્માત સર્જાયો હતો. બસ જ્યારે પહાડી રસ્તા પરથી નીચે ઉતરી રહી હતી ત્યારે અચાનક બસચાલકે સ્ટીયરિંગ પરથી કાબૂ ગુમાવ્યો હતો. પ્રત્યક્ષદર્શીઓના જણાવ્યા અનુસાર, સંભવિત રીતે બસની બ્રેક ફેઈલ થઈ જવાને કારણે ચાલક બસને નિયંત્રિત કરી શક્યો નહોતો અને બસ માર્ગ પર જ પલટી ખાઈ ગઈ હતી. અકસ્માત થતાની સાથે જ બસમાં સવાર મુસાફરોની ચીસાચીસથી પહાડીઓ ગુંજી ઉઠી હતી.
આ અકસ્માતમાં બસમાં સવાર આશરે 24થી વધુ મુસાફરો ઘાયલ થયા છે, જેના કારણે ઘટનાસ્થળે અફરાતફરીનો માહોલ સર્જાયો હતો. સ્થાનિક લોકોએ તાત્કાલિક રાહત કાર્ય શરૂ કર્યું હતું અને પોલીસને જાણ કરી હતી.ઘટનાની જાણ થતાંની સાથે જ સદર પોલીસ સ્ટેશન અને છીપા બેરી ચોકીની ટીમ તાત્કાલિક ઘટનાસ્થળે પહોંચી હતી અને બચાવ કામગીરી શરૂ કરાવી હતી. ઈજાગ્રસ્તોને પ્રાથમિક સારવાર માટે એમ્બ્યુલન્સ મારફતે ટ્રોમા સેન્ટર અને નજીકની હોસ્પિટલમાં ખસેડવામાં આવ્યા હતા.
કોઈપણ પ્રકારની જાનહાનિ ન થતા વહીવટીતંત્રે રાહતનો શ્વાસ લીધો હતો. વિગતો અનુસાર, આ બસ અમદાવાદ કોઈ ખાનગી કંપનીના કર્મચારીઓને લઈને માઉન્ટ આબુ ફરવા ગઈ હતી અને પરત ફરતી વખતે આ અકસ્માત નડ્યો હતો. હાલમાં તમામ ઈજાગ્રસ્તોની સ્થિતિ હાલ સામાન્ય હોવાની વિગતો મળી રહી છે.