અમદાવાદ: વર્લ્ડ કેન્સર ડેના ઉપલક્ષમાં તાજેતરમાં અમદાવાદ મેડિકલ એસોસિએશન (AMA) અને અમદાવાદ કેન્સર ફાઉન્ડેશનના સંયુક્ત ઉપક્રમે એક અનોખા અને ભાવનાત્મક કાર્યક્રમ “ધ ગોલ્ડન વોઇસ” નું આયોજન કરવામાં આવ્યું હતું. આ કાર્યક્રમનો મુખ્ય ઉદ્દેશ્ય સમાજમાં પ્રવર્તતી ગેરમાન્યતા “કેન્સર એટલે જીવનનો અંત” ને તોડવાનો અને કેન્સર બાદ પણ જીવન સકારાત્મક બની શકે છે તેવો સંદેશ આપવાનો હતો.
કેન્સર વોરિયર્સ બન્યા મંચના સિતારા કાર્યક્રમની સૌથી ખાસ વાત એ હતી કે અહીં કેન્સર વોરિયર્સ (કેન્સર વિજેતાઓ) પોતે જ કલાકારની ભૂમિકામાં જોવા મળ્યા હતા. તેમણે મંચ પર આવીને ભાવસભર ગીતો રજૂ કર્યા હતા અને પોતાના પ્રેરણાદાયી અનુભવો વર્ણવ્યા હતા. એક વોરિયરે શંખનાદ કરી વાતાવરણમાં આધ્યાત્મિક ઊર્જા ફેલાવી હતી, જે કેન્સર પરની જીતનું પ્રતિક બની રહ્યું હતું.
આ ઉપરાંત, અગ્રણી એચ બી કાપડીયા સ્કૂલના વિદ્યાર્થીઓએ પણ કાર્યક્રમમાં મહત્વની ભૂમિકા ભજવી હતી. સેકન્ડરી સ્કૂલના વિદ્યાર્થીઓએ ગણેશ વંદના અને પ્રાઇમરી સ્કૂલના બાળકોએ “હોપ ડાન્સ” રજૂ કરીને આશા અને હિંમતનો સંદેશ પાઠવ્યો હતો.
સમાજનો અભિગમ બદલવાનો પ્રયાસ આ પ્રસંગે અમદાવાદ કેન્સર ફાઉન્ડેશનના ડૉ. કૌસ્તુભ પટેલે જણાવ્યું હતું કે, “કેન્સર વિજેતાઓ માત્ર દર્દી નથી પરંતુ સમાજ માટે પ્રેરણાસ્ત્રોત છે. અમારું લક્ષ્ય કેન્સર બાદ દર્દીનું જીવન સન્માનસભર અને ગુણવત્તાપૂર્ણ બને તે સુનિશ્ચિત કરવાનું છે.”
જ્યારે AMA ના પ્રમુખ ડૉ. જિગ્નેશ શાહે કહ્યું હતું કે, “જ્યારે કેન્સર વિજેતાઓ પોતે મંચ પર ઉભા રહી પ્રતિભા રજૂ કરે છે, ત્યારે તે સંદેશ કોઈ પણ ભાષણ કરતા વધુ અસરકારક સાબિત થાય છે.”
અરવિંદ વેગડાની વિશેષ ઉપસ્થિતિ કાર્યક્રમમાં ગુજરાતના લોકપ્રિય ગાયક અરવિંદ વેગડાએ વિશેષ હાજરી આપી હતી. તેમણે કેન્સર વોરિયર્સની હિંમતને બિરદાવી હતી અને પોતાના સુપરહિટ ગીત “ભાઈ ભાઈ” ની રમઝટ બોલાવી હતી, જેના પર ઉપસ્થિત સૌ કોઈ ઝૂમી ઉઠ્યા હતા.
આ કાર્યક્રમમાં ડોક્ટર્સ, દર્દીઓ, તેમના પરિવારજનો અને વિદ્યાર્થીઓ મળીને અંદાજે 250 જેટલા લોકો ઉપસ્થિત રહ્યા હતા. આયોજકોએ ભવિષ્યમાં પણ આવી જનજાગૃતિ પ્રવૃત્તિઓ ચાલુ રાખવાની પ્રતિબદ્ધતા વ્યક્ત કરી હતી.