અમદાવાદ : અમદાવાદમાં અકસ્માતની ત્રણ ભયાનક ઘટનાઓએ સમગ્ર શહેરને હચમચાવી દીધું છે. રફતારના શોખીન નબીરાઓએ નિર્દોષ લોકોના જીવ જોખમમાં મૂક્યા છે. પ્રાપ્ત રિપોર્ટ મુજબ, વસ્ત્રાપુર, એસજી હાઈવે પર અને વટવામાં બનેલી આ ઘટનાઓ ‘હિટ એન્ડ રન’ અને બેફામ ડ્રાઈવિંગનો વરવો નમૂનો પેશ કરે છે.
1. વસ્ત્રાપુરમાં હિટ એન્ડ રનમાં કારની ટક્કરે વૃદ્ધનું મોત
વસ્ત્રાપુરમાં તક્ષશિલા ટાવરમાં રહેતા 84 વર્ષીય મહેશભાઇ રાંદેર ગત 25મી ફેબુ્આરીના રોજ બપોરના સમયે માનસી સર્કલથી સુદર્શન સર્કલથી રસ્તો ક્રોસ કરીને ઘરે પરત આવી રહ્યા હતા ત્યારે કારની ટક્કર લાગતા નીચે પટકાયા હતા અને ગંભીર ઇજાઓ થતા સારવાર માટે નજીકની હોસ્પિટલમાં લઈ જવામાં આવ્યા હતા.
જ્યાં તેમનું મોત નીપજ્યું હતું. જો કે કારચાલકે જણાવ્યું હતુ કે કારની ટક્કર તેમને લાગી નહોતી પણ તે ડરી ગયા હતા.ત્યારબાદ આકરી પુછપરછ કરતા તેણે કબુલ્યુ હતુ કે કારની ટક્કર લાગી હતી. જેના આધારે એ ડીવીઝન ટ્રાફિક પોલીસે કારચાલક પુષ્પદાન ગઢવીએ ગુનો નોંધીને કાર્યવાહી કરી હતી.
2. એસજી હાઈવે પર : ગોતામાં બાઈક ચાલકની ટક્કરે સિક્યુરિટી ગાર્ડનું મોત
ગોતામાં આવેલા શિવપાર્કમાં રહેતા સિદ્ધાર્થસીંગ ચૌહાણ ( ઉ.વ.60) શનિવારે ગોતાથી વૈષ્ણોદેવી તરફ જતા એસ જી હાઇવે રસ્તો ક્રોસ કરતા હતા ત્યારે એક કારચાલકે ટક્કર મારતા તેમને ગંભીર ઇજાઓ થતા મોત નીપજ્યું હતું. તપાસ કરતા કારચાલકનું નામ જીગર જાડેજા (રહે. સનસાઇન હાઇટ્સ-1, કુડાસણ) હોવાનું જાણવા મળ્યું હતું.જે બાદ એસજી હાઈવે ટ્રાફિક પોલીસે આરોપી જીગર જાડેજા સામે ગુનો નોંધી તેની ધરપકડ કરી વધુ તપાસ હાથ ધરી છે.
3. એસપી રીંગ રોડ : વટવામાં પાર્ક ટ્રક પાછળ અથડાતા યુવકે જીવ ગુમાવ્યો
નિકોલમાં રહેતા 19 વર્ષીય વિશાલ સિસોદીયા પાલડીની ખાનગી કંપનીમાં નોકરી કરતો હતો. રોજની જેમ 23મી તારીખે સવારે ટુ-વ્હીલર પર કામે નીકળ્યો હતો. વટવા એસપી રીંગ રોડ તરફ જતા સમયે બ્રિજ ઉતરી રોપડા ચાર રસ્તા નજીક પહોંચતા જ અચાનક રસ્તા પર પાર્કિંગ લાઇટ વિના ઉભેલા ટ્રક સાથે તેની બાઈક જોરદાર અથડાઈ હતી.
ટક્કર બાદ વિશાલ રસ્તા પર પટકાતા તેમના માથામાં ગંભીર ઇજાઓ પહોંચી હતી. જેથી સ્થાનિક લોકોએ તાત્કાલિક તેને સારવાર માટે હોસ્પિટલ ખેસેડ્યો હતો. તાત્કાલિક હોસ્પિટલ ખસેડાયા છતાં ટૂંકી સારવાર બાદ તેનું મોત નિપજ્યું હતું. પ્રાથમિક તપાસમાં ટ્રક ચાલકની બેદરકારી સામે આવતા જે ડિવિઝન ટ્રાફિક પોલીસે ગુનો નોંધી વધુ તપાસ શરૂ કરી છે.