અમદાવાદ : AMC દ્વારા પૂરી પાડવામાં આવતી પાણી, ડ્રેનેજ, સ્ટ્રીટ લાઈટ, વગેરે જેવી માળખાકીય સુવિધાઓ અંગે નાગરિકોની ફરિયાદો નિવારવા માટે શરૂ કરવામાં આવેલ સર્વગ્રાહી ફરિયાદ નિવારણ પ્રણાલી એટલે કે કોમ્પ્રેહેન્સિવ કમ્પ્લેઈન રિડ્રેસલ સિસ્ટમને (CCRS 2.0) હવે આર્ટિફિશિયલ ઇન્ટેલિજન્સની મદદથી અદ્યતન બનાવાશે. જેના પરિણામે નાગરિકોની ફરિયાદોનો નિકાલ કર્યા વિના ફરિયાદોને ‘ક્લોઝ’ કરી દઈ શકાશે નહીં ડેશબોર્ડ વારંવાર આવતી કે લાંબા સમયથી પડતર ફરિયાદો માટે વીકલી રિપોર્ટ્સ અને ઓટોમેટિક એલર્ટ જનરેટ કરશે.AI આધારિત આ સ્માર્ટ પ્લેટફોર્મ તેમની સેવા માટે 24 કલાક કાર્યરત રહેશે.
CCRS 2.0 ની સૌથી મોટી વિશેષતા તેની AI ક્ષમતા છે. જ્યારે કોઈ નાગરિક હેલ્પલાઈન નંબર 155303 પર કોલ કરશે, ત્યારે હ્યુમન ઓપરેટરને બદલે AI વોઈસ એજન્ટ કોલ રિસીવ કરશે અને કુદરતી ભાષામાં સંવાદ કરીને ફરિયાદની વિગતો નોંધશે. આ સિસ્ટમ ગુજરાતી, હિન્દી અને અંગ્રેજી ભાષા સમજી શકે છે. એટલું જ નહીં, વોટ્સએપ ચેટબોટ, ટ્વિટર, એસએમએસ અને મોબાઈલ એપ જેવા વિવિધ માધ્યમોને એક જ પ્લેટફોર્મ પર સાંકળવામાં આવ્યા છે. આનાથી ફરિયાદ નોંધાવવાની પ્રક્રિયા અત્યંત સરળ બની જશે અને ડુપ્લિકેટ ફરિયાદોને ઓળખીને સિસ્ટમ તેની જાતે જ ફિલ્ટર પણ કરી શકશે.
નવી સિસ્ટમમાં માત્ર ફરિયાદ નોંધવી જ નહીં, પણ તેના ઉકેલની ખાતરી કરવાની પણ જોગવાઈ છે. હવે ડ્રેનેજ, પાણી કે સ્ટ્રીટ લાઈટ જેવી સમસ્યાઓ માટે અધિકારીઓએ કામ પૂર્ણ થયા પછીનો ફોટો અપલોડ કરવો પડશે, જેનું AI દ્વારા ક્રોસ-વેરિફિકેશન કરવામાં આવશે. આનાથી “કામ થયા વગર જ ફરિયાદ બંધ થઈ ગઈ” જેવી ફરિયાદોનો કાયમી ઉકેલ આવશે. આ ઉપરાંત, તમામ ફરિયાદોને GIS (જીઓગ્રાફિક ઇન્ફોર્મેશન સિસ્ટમ) નકશા પર પ્લોટ કરવામાં આવશે, જેનાથી કયા વિસ્તારમાં કયા પ્રકારની સમસ્યાઓ વધુ છે તેનું હીટ-મેપ દ્વારા વિશ્લેષણ કરી શકાશે.
CCRS 2.0 માત્ર સમસ્યા આવ્યા પછી કામ નથી કરતી, પરંતુ તે સમસ્યા આવતા પહેલા તેનું પૂર્વાનુમાન પણ કરી શકે છે. AI અને મશીન લર્નિંગ ટેકનોલોજી દ્વારા છેલ્લા કેટલાક વર્ષોના ડેટાનું વિશ્લેષણ કરીને સિસ્ટમ પખવાડિયા મુજબનું અનુમાન તૈયાર કરશે. દાખલા તરીકે, ચોમાસા પહેલા કયા વિસ્તારમાં ગટર ઉભરાવાની શક્યતા વધુ છે તેની આગાહી GIS નકશા પર દર્શાવવામાં આવશે. આનાથી કોર્પોરેશનના અધિકારીઓ પ્રો-એક્ટિવ બનીને સમસ્યા સર્જાય તે પહેલા જ તેનું નિવારણ લાવી શકશે, જે અંતે શહેરની સ્વચ્છતા અને સુવ્યવસ્થામાં વધારો કરશે.
આ પ્રોજેક્ટથી અમદાવાદના નાગરિકોને અનેક ફાયદા થશે. 24*7 કાર્યરત AI ચેટબોટ ગમે ત્યારે મદદ માટે તૈયાર રહેશે, જ્યારે ઓટોમેટેડ એસ્કેલેશન સિસ્ટમ એ સુનિશ્ચિત કરશે કે જો કોઈ અધિકારી સમયસર કામ ન કરે તો ફરિયાદ આપમેળે ઉચ્ચ અધિકારી સુધી પહોંચી જાય. સિસ્ટમમાં નાગરિકોના ફીડબેકનું સેન્ટીમેન્ટ એનાલિસિસ પણ કરવામાં આવશે, જેથી પ્રશાસનને ખબર પડે કે જનતા સેવાઓથી કેટલી સંતુષ્ટ છે. પાંચ વર્ષ સુધીના મેન્ટેનન્સ અને ટેકનિકલ સપોર્ટ સાથેનો આ પ્રોજેક્ટ અમદાવાદને વૈશ્વિક સ્તરનું સ્માર્ટ શહેર બનાવવા તરફનું એક મહત્વનું પગલું છે.