અમદાવાદ : શહેરમાં પ્રી-મોન્સૂન કામગીરીના દાવાઓ વચ્ચે વટવા વિસ્તારના બીબી તળાવ રોડ પર ગત 5મી મેની રાત્રે એકાએક રસ્તો બેસી જતાં સર્જાયેલા વિશાળ ભુવામાં એક નિર્દોષ બાઈક સવાર યુવક ખાબક્યો હતો. તંત્રની આ લાલિયાવાડીને કારણે મોડી રાત્રે અફરાતફરીનો માહોલ સર્જાયો હતો.તંત્રની બેદરકારીએ અનેક સવાલો ઉભા કર્યા છે.
મળતી માહિતી મુજબ, શહેરના વટવા વિસ્તારમાં બીબી તળાવ રોડ પર રાતના સમયે મોટો ભૂવો પડતા એક બાઈકચાલક ભૂવામાં ખાબક્યો હતો. આ ઘટનાની જાણ થતા જ પોલીસ અને ફાયર બ્રિગેડની ટીમ ઘટનાસ્થળે પહોંચી હતી. ફાયર વિભાગના જવાનોએ ભારે જહેમત બાદ દોરડાની મદદથી પેલા ઊંડા ખાડામાં ફસાયેલા બાઈકચાલકને બહાર કાઢ્યો હતો.
ઇજાગ્રસ્ત યુવકને તાત્કાલિક સારવાર માટે નજીકની હોસ્પિટલમાં ખસેડવામાં આવ્યો હતો. સદનસીબે આ દુર્ઘટનામાં યુવકનો જીવ બચી ગયો છે, પરંતુ તંત્રની બેદરકારીએ અનેક સવાલો ઉભા કર્યા છે.આ અણધારી દુર્ઘટના જોઈને આસપાસના લોકો સ્તબ્ધ થઈ ગયા હતા. લોકોએ તુરંત સાવચેતી વાપરી ભુવાની આસપાસ બેરિકેડ્સ ગોઠવી દીધા જેથી અન્ય કોઈ વાહન તેમાં ન ખાબકે.
સૌથી ચોંકાવનારી બાબત એ છે કે, સ્થાનિક નાગરિકોએ ગત 27મી એપ્રિલના રોજ જ લેખિતમાં ડેપ્યુટી સિટી એન્જિનિયરને રજૂઆત કરી હતી કે, આ માર્ગ પર ભુવો પડવાની પૂરી શક્યતા છે. તેમ છતાં, દક્ષિણ ઝોનના એન્જિનિયર વિભાગે આ રજૂઆતને કચરાપેટીમાં નાખી દીધી અને કોઈ જ તપાસ કે સમારકામ કર્યું નહીં.