અમદાવાદ : શહેરમાં ધોળે દિવસે લૂંટ અને ચેન સ્નેચિંગની ઘટનાઓથી નાગરિકોમાં ફફડાટ ફેલાયો છે. સાબરમતી વિસ્તારમાં આઠમી મેના રોજ સવારે દૂધ લેવા નીકળેલા એક યુવકને નિશાન બનાવી બાઈક સવાર બે અજાણ્યા શખસો 60,000 રૂપિયાની કિંમતની સોનાની ચેન અને હીરાનું પેન્ડલ આંચકીને નાસી છૂટ્યા હતા.ભોગ બનનાર યુવકે આ મામલે સાબરમતી પોલીસ સ્ટેશનમાં ફરિયાદ નોંધાવતા પોલીસે સીસીટીવી ફૂટેજના આધારે વધુ તપાસ હાથ ધરી છે.
રિપોર્ટ મુજબ, સાબરમતીના રામનગર વિસ્તારમાં રહેતા અને બોપલ રોડ પર કાપડના શો-રૂમમાં નોકરી કરતા મોક્ષાર્થ પ્રવિણચંદ્ર વોરા ગત સવારે આશરે સવા નવ વાગ્યાની આસપાસ મોક્ષાર્થભાઈ સ્મૃતિ મંદિર પાછળ આવેલા પાર્લરથી દૂધ લઈને પરત ફરી રહ્યા હતા. સ્મૃતિ મંદિરના પાછળના ગેટ પાસે પાછળથી કાળા કલરની બાઈક પર બે ગઠિયાઓ આવ્યા હતા. તેમણે તક જોઈને યુવકના ગળામાંથી 5.070 ગ્રામની સોનાની ચેન અને હીરાનું પેન્ડલ ઝૂંટવી લીધું હતું.અચાનક થયેલા હુમલાથી ગભરાયેલા યુવકે બૂમાબૂમ કરી હતી, પરંતુ આરોપીઓ ગણતરીની સેકન્ડોમાં પલાયન થઈ ગયા હતા.
આ ઘટના બાદ મોક્ષાર્થભાઈએ પોતાના પિતરાઈ ભાઈ સાથે સાબરમતી પોલીસ મથકે પહોંચી અજાણ્યા શખસો વિરુદ્ધ ફરિયાદ નોંધાવી છે. સાબરમતી પોલીસે લૂંટનો ગુનો નોંધી, વિસ્તારના વિવિધ સીસીટીવી કેમેરાના ફૂટેજ એકત્રિત કરીને પલ્સર સવાર ગઠિયાઓને પકડવા માટે તપાસના ચક્રો ગતિમાન કર્યા છે.