અમદાવાદ: અમદાવાદ સહીત સમગ્ર ગુજરાત પોલીસ દ્વારા ચલાવવામાં આવી રહેલા ‘ઓપરેશન મિલાપ’ અંતર્ગત વસ્ત્રાપુર પોલીસ સ્ટેશનની ટીમે સરાહનીય કામગીરી કરીને એક ગુમ થયેલી યુવતીને ગણતરીના કલાકોમાં શોધી કાઢી તેના પરિવાર સાથે સુખદ મિલન કરાવ્યું છે.
રિપોર્ટ મુજબ, વસ્ત્રાપુર વિસ્તારમાં રહેતી પ્રીતિકુમારી નામની યુવતીને તેના ભાઈએ કામ બાબતે ઠપકો આપતા તેણી કોઈને જાણ કર્યા વગર ઘરેથી નીકળી ગઈ હતી. પરિવારજનોએ આ અંગે વસ્ત્રાપુર પોલીસ સ્ટેશનમાં જાણ કરતાં પોલીસ તાત્કાલિક એક્શનમાં આવી હતી.વસ્ત્રાપુર પોલીસ સ્ટેશનના પોલીસ ઇન્સ્પેક્ટર જી. એમ. ચૌધરીના સીધા માર્ગદર્શન હેઠળ સર્વેલન્સ સ્ક્વોર્ડના પોલીસ સબ ઇન્સ્પેક્ટર એમ. બી. ગઢવીની ટીમ તથા ‘શી ટીમ’ (She Team) દ્વારા વસ્ત્રાપુર તેમજ આજુબાજુના વિસ્તારોમાં સઘન તપાસ શરૂ કરવામાં આવી હતી. ટેકનિકલ અને હ્યુમન સોર્સિસની મદદથી તપાસ કરતા પોલીસની ટીમને સાબરમતી રેલવે સ્ટેશન ખાતેથી ગુમ થયેલા પ્રીતિબેન મળી આવ્યા હતા.
સાબરમતી રેલવે સ્ટેશનથી પ્રીતિબેનને હેમખેમ વસ્ત્રાપુર પોલીસ સ્ટેશન ખાતે લાવવામાં આવ્યા હતા. ત્યારબાદ પોલીસે તેમના બંને ભાઈ અને ભાભીને પોલીસ સ્ટેશન બોલાવીને યુવતીનું પરિવાર સાથે સુખદ મિલન કરાવ્યું હતું.ઘરમાંથી અચાનક ચાલી ગયેલી બહેન ગણતરીના કલાકોમાં પાછી મળી આવતા પરિવારે વસ્ત્રાપુર પોલીસનો હૃદયપૂર્વક આભાર માન્યો હતો અને પોલીસની આ ત્વરિત કામગીરીને બિરદાવી હતી.