અમદાવાદ : શહેરમાં મિલકત સંબંધિત ગુનાઓ શોધી કાઢવા માટે ચાલી રહેલી ઝુંબેશ અંતર્ગત વાડજ પોલીસ સ્ટેશનની સર્વેલન્સ સ્કોડ ટીમે ઘરફોડ ચોરી અને એક્ટિવા ચોરીના ગુનાઓ એમ બે અલગ-અલગ ચોરીના ગુનાઓનો ભેદ ઉકેલી આરોપીઓની ધરપકડ કરી પ્રશંસનીય કામગીરી નોંધાવી છે.
પ્રથમ બનાવમાં વાડજ પોલીસે મળેલી બાતમીના આધારે કાર્યવાહી કરીને ઘરમાં સાફ-સફાઈ કરવાના બહાને પ્રવેશ મેળવી સોનાના દાગીના અને રોકડ રકમની ચોરી કરતી ગેંગને ઝડપી પાડવામાં આવી છે. પોલીસ તપાસ દરમિયાન કમલેશ અમરા કીર (ઉ.વ. 24) અને ગોવિંદ શંકર કીર (ઉ.વ. 23) નામના બે આરોપીઓની ધરપકડ કરવામાં આવી હતી. આરોપીઓ પાસેથી આશરે રૂ. 3.42 લાખની કિંમતની સોનાની મગમાળા તથા રોકડ રકમ મળી કુલ રૂ. 3,42,500નો મુદ્દામાલ કબજે કરવામાં આવ્યો છે. આ અંગે વાડજ પોલીસ સ્ટેશનમાં નોંધાયેલા ગુનાનો ભેદ ઉકેલી પોલીસે મહત્વપૂર્ણ સફળતા મેળવી છે.
બીજા બનાવમાં વાડજ પોલીસે મળેલી બાતમીના આધારે કાર્યવાહી કરીને છેલ્લા આઠેક માસથી અનડિટેક્ટ રહેલા એક્ટિવા ચોરીના ગુનાનો ભેદ ઉકેલવામાં આવ્યો હતો. સીસીટીવી ફૂટેજ, ANPR સિસ્ટમ અને હ્યુમન ઇન્ટેલિજન્સના આધારે તપાસ હાથ ધરતા ઇલામ દસ્તગીર યાકુબભાઈ શેખ (ઉ.વ. 35)ની ધરપકડ કરવામાં આવી હતી. આરોપી પાસેથી ચોરી થયેલી હોન્ડા એક્ટિવા (નં. GJ-01-MB-2762) કબજે કરવામાં આવી હતી, જેની અંદાજિત કિંમત રૂ. 15 હજાર હોવાનું પોલીસે જણાવ્યું છે.
આ બંને સફળ કામગીરી વાડજ પોલીસ સ્ટેશનના પોલીસ ઇન્સ્પેક્ટર એચ.પી. ગરાસિયા તથા પો.સબ.ઇન્સ્પેક્ટર જી.આર. આલ અને તેમની ટીમ દ્વારા હાથ ધરવામાં આવી હતી. વાડજ પોલીસે આરોપીઓની વધુ પૂછપરછ શરૂ કરી છે અને અન્ય ગુનાઓમાં તેમની સંડોવણી છે કે નહિ એ દિશામાં તપાસ ચાલી રહી છે.