અમદાવાદ : અમદાવાદમાં અનેક વર્ષો જૂની હાઉસિંગ સોસાયટીઓના રિડેવલપમેન્ટના કામ પાટે ચડી રહ્યા છે અને તેમાં કેટલીક જગ્યાએ વિવાદ પણ થાય છે. શહેરના વેજલપુર વિસ્તારની એક હાઉસિંગ સોસાયટીના રિડેવલપમેન્ટ અંગે ગુજરાત હાઈકોર્ટની ડિવિઝન બેન્ચે સિંગલ જજના ચુકાદાને માન્ય રાખીને રિડેવલપમેન્ટને મંજૂરી આપી છે. આ હાઉસિંગ સોસાયટીના 75 ટકાથી વધારે ફ્લેટમાલિકોએ રિડેવલપમેન્ટ માટે સહમતી આપી હોવાનું જણાવી બાકીના ચાર ફ્લેટમાલિકોનો વાંધો ફગાવ્યો હતો.
મીડિયા રિપોર્ટ મુજબ વેજલપુરના સ્વામી વિવેકાનંદનગર કોઓપરેટિવ હાઉસિંગ સોસાયટીમાં બાંધકામ જર્જરિત હોવાને કારણે કુલ 78 ફ્લેટમાંથી 74 ફ્લેટધારકોએ રિડેવલપમેન્ટ માટે સહમતી આપી છે. જ્યારે બાકીના ચાર ફ્લેટધારકો તેની વિરુદ્ધ હતા. ટકાવારીની રીતે જોતા 93 ટકા ફ્લેટધારકોની સહમતી હોવાના કારણે સિંગલ જજની બેન્ચે 21 જૂન 2022ના રોજ રિડેવલપમેન્ટનો રસ્તો ખોલી આપ્યો હતો અને કહ્યું હતું કે ગુજરાત ઓનરિપ ફ્લેટ્સ એક્ટની શરતોનું પાલન થાય છે. આ રિડેવલપમેન્ટ સામે બાકીના ફ્લેટધારકોએ ઉઠાવેલો વાંધો ફગાવી દેવાયો હતો.
2019માં સોસાયટીના સભ્યોએ રિડેવલપમેન્ટ માટે નિર્ણય લીધો અને તેમણે એક્સેલ લાઈફ સ્પેસ LLP સાથે આ માટે એગ્રીમેન્ટ કર્યા હતા. પરંતુ ચાર ફ્લેટધારકોએ વાંધો લીધો હોવાથી આ મુદ્દો હાઈકોર્ટમાં પહોંચ્યો. તે સમયે કાયદો સુધારવામાં આવ્યો હતો અને હાઉસિંગ સોસાયટીના રિડેવલપમેન્ટ માટે 75 ટકા સભ્યોની મંજૂરી પૂરતી ગણવામાં આવી હતી. હાઈકોર્ટે AMCને આ રિડેવલપમેન્ટની અરજી પર વિચારણા કરવા કહ્યું. કોર્પોરેશને આ જૂની ઇમારત તોડીને તેની જગ્યાએ નવું બિલ્ડિંગ બાંધવામાં આવે તો આ પ્રકારના ડેવલપમેન્ટને મંજૂરી આપી શકાય.
હાઈકોર્ટે આ વિવાદમાં મોટા ભાગના ફ્લેટધારકોના મત સાથે સહમતી દર્શાવી હતી. સોસાયટીના રિડેવલપમેન્ટ સામે વાંધો ઉઠાવનારા ચાર ફ્લેટધારકોનો વાંધો ફગાવી તેઓને ફ્લેટ ખાલી કરવા જણાવ્યું હતું.
