અમદાવાદ : અમદાવાદમાં 15મી ઓગસ્ટના દિવસે બ્લાસ્ટ કરવાની ધમકી આપતો કોલ આવ્યો હતો. આ કોલ આવતા શહેર પોલીસ અને તમામ એજન્સી એક્ટિવ થઈ ગઈ હતી, ત્યારે એક યુવકે અભ્યાસના ભારણના કારણે આ કોલ કર્યાનું સામે આવતા પોલીસે કુબેરનગરથી દબોચીને આરોપીની સામે ગુનો નોંધી ધરપકડ કરી છે.
પ્રાપ્ત રિપોર્ટ મુજબ, જ્યાં દેશભરમાં સ્વાતંત્ર્ય પર્વની તૈયારીઓ કરવામાં આવી રહી છે ત્યાં અમદાવાદ શહેર પોલીસને 15 મી ઓગસ્ટના દિવસે જ બૉમ્બ બ્લાસ્ટ કરવાનો ધમકીભર્યો કોલ મળતા જ પોલીસે તરત જ કાર્યવાહી હાથ ધરી હતી.પોલીસને કોલ મળતાની સાથે જ આરોપીને પકડવા માટે તજવીજ હાથ ધરી હતી, ફોન નંબરના આધારે ક્રાઈમ બ્રાન્ચે તપાસ કરતા કુબેરનગર વિસ્તારમાંથી અરહિંત જૈન નામના યુવકને ઝડપવામાં આવ્યો હતો. પ્રાથમિક તપાસમાં સામે આવ્યું કે, અભ્યાસના વધુ પ્રેશરના કારણે યુવક ડિપ્રેશનમાં આવ્યો હતો. જેની માનસિક સ્થિતિ યોગ્ય ન હોવાનું સામે આવ્યું છે. જે યુવકે મજાક મસ્તીમાં કોલ કર્યો હોવાનું સામે આવતા તેની વિરુદ્ધમાં સરદારનગર પોલીસ મથકે ગુનો નોંધી કાર્યવાહી શરૂ કરવામાં આવી છે.
અમદાવાદ ક્રાઈમ બ્રાન્ચે જણાવ્યું હતું કે, 15 મી ઓગસ્ટના બૉમ્બ બ્લાસ્ટ કરવાનો ધમકીભર્યો કોલ મળ્યો હતો. આ મામલે તરત જ તપાસ કરવામાં કાંકરિયાના રહેવાસી અરહિંત જૈન નામના યુવકની ધરપકડ કરવામાં આવી છે. આ યુવક ગ્રેજ્યુએશન કરી રહ્યો છે. તેની પુછપરછ કરતા પ્રાથમિક તારણ સામે આવ્યું છે કે, આ યુવક માનસિક રીતે અસ્વસ્થ છે અને અભ્યાસના પ્રેશરને કારણે આ પ્રકારનો ફોન કર્યો હતો.