અમદાવાદ : ગોતાબ્રિજ ચાર રસ્તા પાસે અજાણ્યા વાહનચાલકે બાઇક પર સવાર વૃધ્ધ દંપતીને ટક્કર મારતા વૃધ્ધનું સારવાર દરમ્યાન મોત થયુ હતુ. અકસ્માત બાદ અજાણ્યો વાહનચાલક ફરાર થઇ ગયો હતો. આ અંગે એસજી હાઇવે ટ્રાફિક પોલીસે અજાણ્યા વાહનચાલક સામે ગુનો નોધીને વધુ તપાસ શરૂ કરી છે.
પ્રાપ્ત રિપોર્ટ મુજબ, ગત 2 નવેમ્બરે નવા વાડજમાં રહેતા 65 વર્ષીય પ્રફુલકુમાર પરમાર પોતાની પત્ની ઉષાબેન સાથે બાઇક લઇને ઘુમામાં આવેલ પુરષોત્તમ લાલજી મહારાજના આશ્રમમાં ગયા હતા. ત્યાંથી તેઓ પરત ઘરે આવતા હતા ત્યારે ગોતાબ્રિજ ચાર રસ્તા પાસે ક્રોસ કરતી વખતે પુરઝડપે આવી રહેલ અજાણ્યા વાહનચાલકે બાઇકને ટક્કર મારી હતી. જેથી વૃધ્ધ દંપતી જમીન પર પટકાતા ગંભીર રીતે ઇજાગ્રસ્ત થયુ હતુ.
અકસ્માત બાદ અજાણ્યો વાહનચાલક ફરાર થઇ ગયો હતો ત્યારે આસપાસના લોકોએ ઇજાગ્રસ્ત દંપતીને સારવારઅર્થે હોસ્પિટલમાં લઇ જવામાં આવ્યુ હતુ. જ્યાં સારવાર દરમ્યાન 5 નવેમ્બરે પ્રફુલભાઇનું મોત નિપજ્યુ હતુ. આ અંગે તેમના પુત્ર કરણે અજાણ્યા વાહનચાલક સામે એસજી હાઇવે-1 ટ્રાફિક પોલીસ સ્ટેશનમાં ફરિયાદ નોધાવતા પોલીસે સીસીટીવી ફૂટેજના આધારે તપાસ શરૂ કરી છે.
