અમદાવાદ: શહેર પોલીસની કોમ્બિંગ નાઈટમાં ફરી એક વખત પોલીસ કર્મચારીનો જીવ જતા બચી ગયો છે. ફરજ દરમિયાન એક કાર ચાલક નબીરાએ ગાડી નહિ રોકીને પુરઝડપે ગાડી ચલાવી પોલીસ કર્મચારીને ગાડી પર ઢસડ્યો હતો. જો કે આરોપી ગાડીને વાંકી ચૂકી ચલાવીને પોલીસ કોન્સ્ટેબલને નીચે પાડીને ફરાર થઈ ગયો હતો.જેમાં પોલીસ કર્મચારીને ગંભીર ઈજા થઈ હતી. સમગ્ર ઘટના બાદ ચાંદખેડા પોલીસે ગુનો નોંધી ફોર્ચ્યુન ગાડીમાં સવાર અનુજ પટેલ અને પાયલ પટેલની ધરપકડ કરી છે.
પ્રાપ્ત રિપોર્ટ મુજબ, ઘટનાની વાત કરીએ તો ચાંદખેડા પોલીસની ટીમ રાત્રિના તપોવન સર્કલ પાસે કોમ્બિંગમાં વાહન ચેકિંગ કરી રહી હતી. ત્યારે GJ- 01- KQ- 2979 નંબરની ફોર્ચ્યુનર કાર લઈને આવેલ ચાલક અનુજ પટેલ ત્યાંથી પસાર થઈ રહ્યો હતો. ત્યારે પોલીસે ચેકિંગ માટે રોકવાનો કોશિશ કરી ત્યારે કાર ચાલક અનુજ પટેલ ગાડી નહિ રોકી અને ફરાર થવાની કોશિશ કરી હતી. અનુજ પટેલને જ્યારે પોલીસે રોકવાનો પ્રયાસ કર્યો ત્યારે તેણે પોલીસ કર્મચારી નિતેશ માળી અને રાયમલભાઈની પર ગાડી ચડાવાની કોશિશ કરી હતી.જેમાં પોલીસ કોન્સ્ટેબલ રાયમલભાઈ ગંભીર રીતે ઈજાગ્રસ્ત થતાં સારવાર માટે ખસેડવામાં આવ્યા હતા.
સમગ્ર ઘટના બાદ ચાંદખેડા પોલીસે ગુનો દાખલ કર્યો હતો. જેમાં તપાસ દરમિયાન GJ-01-KQ-2979 નંબરની ફોર્ચ્યુનર ગાડીમાં અનુજ પટેલ અને તેમની પત્ની પાયલ પટેલ સાથે સવાર હોવાનું સામે આવ્યું હતું. પોલીસે સાયન્સ સીટી વિસ્તારમાં શુભમ બંગ્લોઝની બાજુમાં આવેલા દત્ત રેસીડેન્સીમાં રહેતા હોવાની સામે આવ્યું હતુ. જે દરમિયાન અનુજ પટેલ અને તેની પત્ની પાયલ પટેલ ઘરે જ મળી આવતા પોલીસે બંનેની ધરપકડ કરી હતી. તેમજ GJ-01-KQ-2979 નંબરની ફોર્ચ્યુનર ગાડી પણ પોલીસે કબજે કરી છે. આરોપી અનુજ પટેલની મેડિકલ ચેકઅપ પણ હાથ ધરવામાં આવી છે. તેમજ આરોપીએ પ્રાથમિક પૂછપરછમાં વાહન ચેકીંગના ડરના કારણે વાહન ભગાવ્યું હોવાની પોલીસ સમક્ષ કબુલ્યું છે. જો કે, પોલીસે સમગ્ર મામલે તપાસ હાથ ધરી છે
