અમદાવાદ : 1 જાન્યુઆરીથી અમદાવાદમાં પાલતુ શ્વાન રાખવા રજિસ્ટ્રેશન કરાવવુ ફરજિયાત બનાવવામાં આવ્યુ છે.શહેરીજનો જો પાલતુ શ્વાન રાખવા માંગતા હોય તો તેમણે મ્યુનિસિપલ કોર્પોરેશનમાં ઓનલાઈન રજિસ્ટ્રેશન કરાવવા રુપિયા 200 ફી ભરવાની સાથે શ્વાનના ફોટોગ્રાફ સાથે તેને રાખવાની જગ્યા સાથેના જરુરી પુરાવા રજૂ કરવા પડશે.
પ્રાપ્ત રિપોર્ટ મુજબ, અમદાવાદમાં પાળતું શ્વાનને લાગતા ડોગ લવરને મ્યુનિસિપલ કોર્પોરેશને નોટિસ દ્વારા જણાવ્યું છે કે, શહેરમાં રોડ પર રખડતા શ્વાન અંગેની ગણતરી મ્યુનિસિપલ કોર્પોરેશન દ્વારા કરવામાં આવતી હોય છે, પરંતુ જે નાગરિકો ઘરમાં શ્વાન પાળતા હોય (પેટ ડોગ) એવા શ્વાનની ગણતરી કરવામાં નહોતી આવતી. જેને પગલે મ્યુનિસિપલ કોર્પોરેશનના સીએનસીડી વિભાગે હવે આવા પેટ ડોગની રજીસ્ટ્રેશનની પ્રક્રિયા શરૂ કરી છે.
શહેરમાં રાખવામાં આવતા પાળતું શ્વાન (પેટ ડોગ)ના માલિકો / નાગરિકો જોગ જાહેર નોટિસ આપી જણાવવામાં આવ્યું છે. સુપ્રીમ કોર્ટની ગાઈડ લાઈન અને એનીમલ બર્થ કંટ્રોલ (ABC) ડોગ્સ રૂલ્સ- 2023 તથા National Action Plan for Dog Mediated Rabies Elimination from India, 2030 (NAPRE), Rabies free Ahmedabad cityની ગાઈડલાઈન અનુસાર શહેરમાં રાખવામાં આવતા પાળતું શ્વાન (પેટ ડોગ)નું રજીસ્ટ્રેશન 1 જાન્યુઆરી 2025થી 90 દિવસ સુધીમાં કરાવવાનું રહેશે.
આ રજિસ્ટ્રેશનની પ્રક્રિયા માટે અમદાવાદ મ્યુનિસિપલ કોર્પોરેશનની વેબ સાઇટ https://ahmedabadcity.gov.in ૫રથી ઓનલાઈન માધ્યમથી જરૂરી વિગતો ભરી, પુરાવા સબમીટ કરી પ્રતિ પાળતું શ્વાન (પેટ ડોગ) નોંધણી ફી રૂ. 200 ચૂકવવાના રહેશે. સંપૂર્ણપણે ઓનલાઈન રજીસ્ટ્રેશન પ્રક્રિયા રહેશે. જો જરૂર જણાય તો જમાલપુર જગન્નાથ મંદિરની સામે સેન્ટ્રલ સ્ટોર વિભાગની અંદર આવેલા સીએનસીડી વિભાગમાં સુપ્રિટેન્ડન્ટ અને વેટરનીટી ડોક્ટરનો સંપર્ક કરવાનો રહેશે.
જરૂરી પુરાવા / પ્રક્રિયા
અરજદારનું આધાર કાર્ડ/ચૂંટણી કાર્ડ
અરજદારનું ટેક્ષ બિલ
અરજદારનું લાઈટ બિલ
અરજદારનો ફોટોગ્રાફસ
પાળતું શ્વાન (પેટ ડોગ)નો ફોટોગ્રાફસ
પાળતું શ્વાન (પેટ ડોગ) રાખવાના સ્થળનો ફોટોગ્રાફસ
