અમદાવાદ: તાજેતરમાં વીડિયો કોલ કૌભાંડ બાદ એક નવો સાયબર ક્રાઇમ પ્રકાશમાં આવ્યો છે. જેમાં વોટ્સએપ પર લોકોને નકલી લગ્નની કંકોત્રી મોકલવામાં આવે છે. જેને ક્લિક કરો તો તમારું બેંક એકાઉન્ટ ખાલી થઈ શકે છે. આવા બે બનાવ ગુજરાતના સાયબર ક્રાઇમના ધ્યાને પણ આવ્યા છે. જોકે, આ બંને કિસ્સામાં નાગરિકોની સભાનતાને કારણે કોઈ આર્થિક નુકસાન થયું નથી.
આજથી ધનારક શરૂ થઈ જશે પરંતુ આગામી સમય માટેની કંકોત્રીઓ આવવાની તો ચાલુ જ રહેશે.લોકો ડિજિટલ કંકોત્રી વોટ્સએપમાં મોકલીને આમંત્રણ પાઠવવાનો ક્રેઝ વધ્યો છે. આ ચલણને કારણે સાયબર ગઠિયાઓએ પણ નવી મોડેસ ઓપરેન્ડી બનાવી દીધી છે. વોટ્સએપથી ડિજિટલ કંકોત્રી મોકલીને તેમાં પહેલા પાનમાં આમંત્રણ હોય છે તે પેજ પર ક્લિક કરવામાં આવે કે ફોનમાં વાયરસ ઇન્સ્ટોલ થઈ જતો હોય છે. બાદમાં કોઈ અલગ જ નંબર પરથી કોલ આવવા લાગે છે અને તમારું બેંક બેલેન્સ ખાલી થઈ જાય છે.
વધુમાં જણાવીએ તો, તમને એક અજાણ્યા નંબર પરથી લગ્નની કંકોત્રીની પીડીએફ ફાઇલ મોકલવામાં આવે છે. જ્યારે તમે આ PDF ડાઉનલોડ કરો છો ત્યારે તમને જાણ્યા વિના તમારા ફોનમાં એક APK ફાઇલ પણ ડાઉનલોડ થઈ જાય છે, જે તમારા ફોનમાં માલવેર ઇન્સ્ટોલ કરે છે.એકવાર આ માલવેર તમારા ફોનમાં ઇન્સ્ટોલ થઈ જાય પછી, હેકર્સને તમારા ફોનમાં હાજર બેંકિંગ એપ્સ, OTP અને એકાઉન્ટની વિગતોનું એક્સેસ મળે છે. આ પછી હેકર્સ તમારા બેંક ખાતામાંથી પૈસા ઉપાડી લે છે.
આ અંગે સ્ટેટ સાયબર ક્રાઇમ જણાવ્યા મુજબ લગ્નની ડિજિટલ કંકોત્રી મોકલીને ફોન હેક કર્યા હોવાના કેટલાક કિસ્સા અમારે ધ્યાને આવ્યા છે. હાલ બહુ જ ઓછી રજૂઆત સ્ટેટ સાયબર ક્રાઇમને મળી છે. અમારી સાયબર એક્સપર્ટની ટીમ હાલ આ વિષય પર કામ કરી રહી છે. ખૂબ જ ટૂંકા ગાળામાં આ બાબતે પણ નિરાકરણ લાવી દેવાશે.