અમદાવાદ : અમદાવાદના એસજી હાઇવે પર સ્કૂલ બસને આગ લાગી હોવાના સમાચાર પ્રાપ્ત થયા છે. એસ.જી. હાઇવે પર ગોતા નજીક એક ખાનગી સ્કૂલ બસને આગ લાગતાં ચકચાર મચી જવા પામ્યો હતો. સમયસૂચકતા દાખવી તમામ વિદ્યાર્થીઓને સહી સલામત રીતે બસમાંથી ઉતારી દેવામાં આવ્યા હતા. જેથી સદનસીદે કોઈ જાનહાની થઈ નથી.
પ્રાપ્ત રિપોર્ટ મુજબ, અમદાવાદનાં ગોતા વિસ્તારમાં આવેલા વસંતનગર ટાઉનશીપ પાસે ત્યારે અફરાતફરી મચી જવા પામી જ્યારે ત્યાંથી પસાર થતી એક ખાનગી સ્કૂલ બસમાં અચાનક ભીષણ આગ ભભૂકી ઊઠી હતી. આગ એટલી વિકરાળ હતી ધુમાડાનાં ગોટેગોટા દૂર દૂર સુધી દેખાયા હતા. જો કે, રાહતની વાત એ છે કે બસમાં સવાર તમામ બાળકોને સમય રહેતા બહાર કાઢી લેવામાં આવ્યા હતા, જેથી મોટી જાનહાનિ ટળી છે.
સ્કૂલ બસને આગ લાગી હોવાની જાણ થતાં બાળકોની વાલીઓમાં દોડધામ મચી જવા પામી હતી. ઘટનાસ્થળે વાલીઓના ટોળેટોળા ઉમટી પડ્યા હતા. જોકે તમામ વિદ્યાર્થીઓને સહી સલામત બહાર કાઢી લેવામાં આવતાં વાલીઓએ રાહતનો શ્વાસ લીધો હતો. આ અંગે પોલીસે જણાવ્યું હતું કે આગ કયા કારણોસર લાગી હતી તે અંગે હજુ સુધી જાણી શકાયું નથી આ અંગે તપાસ ચાલુ છે.