અમદાવાદ: નરોડા પોલીસ સ્ટેશનની PCR ગાડીમાંથી દારૂ અને રોકડ રકમ મળી આવતા ખળભળાટ મચ્યો છે. PCR ગાડીમાં ઇન્ચાર્જની હાજરીમાં બે બોટલ દારૂ અને 30,000 રોકડ મળી આવ્યા છે. PCR ગાડીના ઇન્ચાર્જ સતીશ જીવણ ઠાકોર અને હોમગાર્ડ વિક્રમ રણજીત રાજપુત સામે નરોડા પોલીસ સ્ટેશનમાં ફરિયાદ નોંધાઈ છે. બે બોટલ વિદેશી દારૂ હંસપુરામાંથી રિક્ષા ચાલક પાસેથી લીધો હોવાની હકિકત સામે આવી છે.
પ્રાપ્ત રિપોર્ટ મુજબ, નરોડા પોલીસ સ્ટેશનના ડિસ્ટાફમાં ફરજ બજાવતા કિરણકુમાર બાબુજીએ ફરિયાદ નોંધાવી છે કે, તેઓ નરોડા પોલીસ લાઇનના ગેટ પાસે ગેલેક્ષી ચાર રસ્તા તરફ હતાં. પોલીસ સ્ટેશનની PCR વાન નં.91માં મોબાઇલ વાનના ઈન્ચાર્જ તથા તેમની સાથે નોકરી કરતા હોમગાર્ડએ કોઈ જગ્યાએથી એક કાળા કલરની બેગમાં વિદેશી દારૂની શીલબંધ બોટલો PCR માં રાખી છે. આ માહિતીના આધારે પોલીસે PCR વાન રોકીને તપાસ કરતા PCR ના ઇનચાર્જ પોતાનું નામ સતીશ જીવણજી ઠાકોર અને તેમની સાથે હાજર હોમગાર્ડે પોતાનું નામ વિક્રમસિંહ રણજીતસિંહ રાજપૂત હોવાનું જણાવ્યું હતું .
પોલીસે જ્યારે PCR વાનમાં તપાસ કરી ત્યારે પાછળની સીટમાં બેસેલ હોમગાર્ડ વીકમસિંહે ગાડીમાંથી એક કાળા કલરનો થેલો લઈ ભાગવાનો પ્રયાસ કર્યો હતો. પોલીસે તેને રોકી લેતા તેના થેલામાંથી દારૂની બે બોટલ અને 30 હજાર રૂપિયા મળી આવ્યા હતા. આ બંનેની પાસે કોઈ યોગ્ય જવાબ ન મળતા પોલીએ બન્નેની ધરપકડ કરી કાર્યવાહી શરૂ કરી છે.
નરોડા પોલીસ સ્ટેશનના ઇન્ચાર્જ PI અભિષેક ધવનની નિમણુંક થતાની સાથે જ બુધવાર રાત્રીના સમયે નરોડાના મુઠીયા ગામમાં રહેતા જીગ્નેશ નામના બુટલેગર અને તેના ભાઈ કાલીની ધરપકડ કરવા માટે નરોડા પોલીસ સ્ટેશનનો સ્ટાફ તથા ઝોન -4 એલસીબીના કર્મીઓએ કોમ્બિંગ હાથ ધર્યું હતું. જેમાં લીસ્ટેડ બુટલેગર જીગો પોલીસને હાથતાળી આપવામાં સફળ રહ્યો હતો. પરંતુ પોલીસે તેના ટપોરી ભાઈ કાલીની દારૂના જથ્થા સાથે ધરપકડ કરી હતી. નામચીહ્ન બુટલેગર જીગાના સગા ભાઈ કાલીની ધરપકડ કર્યા બાદ પોલીસ ડંડા વડે તેની આગતા-સ્વાગતા કરીને કાયદાનો પાઠ પોલીસની ભષામાં ભણાવ્યો છે.
નરોડા અને તેની આસપાસના વિસ્તારમાં લીસ્ટેડ બુટલેગરોના મકાનોમાં બુધવાર સાંજથી સર્ચ ઓપરેશન શરુ કરવામાં આવ્યું હતું. જેના પગલે સમગ્ર વિસ્તારમાં રહેતા ગુનેગારોમાં ફફડાટ વ્યાપી ઉઠ્યો છે. મુઠીયા ગામમાં રહેતા અને પ્રોહીબીશનની પ્રવૃત્તિ સાથે સંકળયેલા ઘણાખરા લીસ્ટેડ બુટલેગરો અને ટપોરીઓ હાલ ભૂગર્ભમાં ઉતરી ગયા હોવાનું જાણવા મળી રહ્યું છે.
તાજેતરમાં જ સ્ટેટ મોનીટરીંગ સેલ દ્વારા નરોડામાંથી દારનું ગોડાઉન ઝડપી પાડવામાં આવ્યું હતું, જેના પગલે PI એમ.વી પટેલની K કંપનીમાં નિમણુંક કરવામાં આવી હતી. ત્યારબાદ નરોડા પોલીસ સ્ટેશનનો વધારાનો ચાર્જ કૃષ્ણનગર પોલીસ સ્ટેશનના ઇન્સ્પેકટર અભિષેક ધવનને સોંપવામાં આવ્યો છે.