અમદાવાદ : છેલ્લા ઘણા સમયથી ગુજરાતમાં અવારનવાર ડ્રગ્સ પકડાવાના સમાચાર આવતા રહે છે. સાથે સાથે ડ્રગ્સના અવૈધ કારોબાર સામે પોલીસની કડક કાર્યવાહી સતત ચાલતી રહેતી હોય છે. તેવામાં અમદાવાદમાંથી ગુજરાત ATS દ્વારા 27 લાખના ડ્રગ્સ સાથે એક આરોપીની ધરપકડ કરવામાં આવી છે.
ગુજરાત ATS એ અમદાવાદના લાલ દરવાજા પાસેથી ફરજાન શેખ નામના ડ્રગ્સ પેડલરને ઝડપી પાડ્યો છે. ATS ને આ અંગેની બાતમી મળી હતી. જે બાદ વોચ રાખીને આ આરોપીને ઝડપી પાડવામાં આવ્યો હતો. મળતી માહિતી પ્રમાણે, ફરજાન શેખ પાસેથી આશરે 55 ગ્રામ જેટલો એમડી ડ્રગ્સનો જથ્થો મળી આવ્યો હતો. આ ડ્રગ્સની બજાર કિંમત 27 લાખ રૂપિયા આંકવામાં આવી રહી છે.
ગુજરાત ATS દ્વારા આ આરોપીને ઝડપી પાડી વધુ સખત તપાસ હાથ ધરવામાં આવી છે. આરોપી આ ડ્રગ્સ કોની પાસેથી લાવ્યો હતો અને કોને આપવાનો હતો તે દિશામાં તપાસ હાથ ધરવામાં આવી રહી છે.છેલ્લા ત્રણ વર્ષથી ડ્રગ્સનો ધંધો બેરોકટોક ચલાવી રહ્યો છે. ફરહાનની ધરપકડ બાદ ડ્રગ્સના મોટા માથાની સંડોવણી ખુલે તેવી શક્યતાઓ છે.
ડ્રગ્સના નેટવર્કનો પર્દાફાશ અનેક વખત પોલીસ તેમજ સુરક્ષા એજન્સીઓ દ્વારા કરવામાં આવે છે, પરંતુ ડ્રગ્સ માફિયા પોતાનું નેટવર્ક અમદાવાદ સહિત ગુજરાતમાં એવી રીતે ઘૂસાડી દીધુ છે કે જેનો હિસ્સો ઘણા લોકો પણ બની ગયા છે. યુવકો અને યુવતીઓ ડ્રગ્સના નશામાં એવી રીતે ડુબી ગયા છે કે, હવે ડ્રગ્સ માફીયાઓને ફાવતુ મળી ગયુ છે. ડ્રગ્સ માફીયાને તો પોલીસ રોકી રહી છે, પરંતુ નશો કરનારને પકડવા માટે પણ પોલીસે એક અભિયાન શરૂ કર્યુ છે.