અમદાવાદ : અમદાવાદ જિલ્લા શિક્ષણાધિકારીએ નિયત કરતા વધારે ફી લેતી એક સ્કૂલને નોટિસ ફટકારી છે. ચાંદખેડાની સાકાર સ્કૂલ એફઆરસી દ્વારા નિયત કરવામાં આવેલી ફી કરતા વધારે ફી ઊઘરાવી રહી હતી. સ્કૂલે વાલીઓ પાસેથી બેના બદલે ત્રણ ટર્મની ફી વસૂલી હતી. આ મામલે વાલીઓએ ફરિયાદ કરતા ડીઈઓએ સ્કૂલને કારણ દર્શક નોટિસ આપી છે.
પ્રાપ્ત રિપોર્ટ મુજબ, ચાંદખેડાની સાકાર સ્કૂલને ફી કમિટીએ નક્કી કર્યા કરતાં વધુ ફી ઉઘરાવવા મુદ્દે શહેર જિલ્લા શિક્ષણાધિકારી દ્વારા નોટિસ આપવામાં આવી છે. સ્કૂલને 5 દિવસમાં ખુલાસો કરવા જણાવાયું છે. વાલીની ફરિયાદને આધારે ડીઈઓ દ્વારા સ્કૂલને સ્પષ્ટતા કરવાની નોટિસ અપાઈ છે. વાલી અને સ્કૂલ બંનેએ ફી મુદ્દે આધાર અને દસ્તાવેજો સાથે હાજર રહેવાના આદેશ કરાયા છે.
ફી કમિટીએ નક્કી કરેલી ફી કરતાં સ્કૂલો વધારે ફી ન લઈ શકે. ઘણી વાર સ્કૂલો ઇત્તર પ્રવૃત્તિના નામે સ્કૂલો વધારે ફી ઉઘરાવે છે. વાલી પર દબાણ કરીને તેમાં ભાગ લેવા જણાવે છે, પરંતુ નિયમ મુજબ આ પ્રકારની કોઈ પ્રવૃત્તિ સ્કૂલો કરી શકે નહીં.