અમદાવાદ : અમદાવાદના ગોદરેજ ગાર્ડન સિટીમાં આવેલી ગ્લોબલ ઇન્ડિયન ઇન્ટરનેશનલ સ્કૂલ સામે મોટી કાર્યવાહી સામે આવી છે.FRC એ ગ્લોબલ ઇન્ડિયન ઇન્ટરનેશનલ સ્કૂલને રૂપિયા 3 લાખનો દંડ ફટકાર્યો છે. શાળાએ રૂપિયા 80 હજારની સામે 81 હજાર ફી વસૂલી હોવાની બાબત સામે આવતા આ કાર્યવાહી કરવામાં આવી છે.
પ્રાપ્ત રિપોર્ટ મુજબ, અમદાવાદના જગતપુરમાં ગોદરેજ ગાર્ડન સિટીમાં આવેલી ગ્લોબલ ઇન્ડિયન ઇન્ટરનેશનલ સ્કૂલ દ્વારા રૂપિયા 80 હજારની સામે 81 હજાર રૂપિયા ફી વસૂલવામાં આવી હોવાની બાબત સામે આવી હતી. આ અંગે વાલીઓએ જિલ્લા શિક્ષણાધિકારી અને FRC માં ફરિયાદ પણ કરી હતી. વાલીઓની ફરિયાદનાં આધારે FRC એ તપાસ કરી 15 દિવસમાં વાલીઓને રૂપિયા પરત કરવા સ્કૂલને આદેશ કર્યો અને સાથે જ રૂપિયા 3 લાખનો દંડ પણ ફટકાર્યો છે.
ફી રેગ્યુલેશન કમિટી (FRC) દ્વારા એફઆરસી એકટ હેઠળ નક્કી કરવામાં આવેલ ફી વસૂલી નિયમોનું પાલન કરવા શાળાઓને આદેશ કરાયો છે. પરંતુ, તેમ છતાં કેટલીક શાળાઓ દ્વારા નિયમોની વિરુદ્ધ જઈ વાલીઓ પાસેથી વધુ ફી વસૂલવામાં આવી રહી છે. આ પ્રકારની સ્કૂલો સામે FRC દ્વારા દંડનીય કાર્યવાહી કરવામાં આવે છે. ત્યારે હવે વધુ એક સ્કૂલ સામે દંડનીય કાર્યવાહી કરવામાં આવી છે.