અમદાવાદ : રાજ્યમાં વધતી જતી હિટ એન્ડ રનની ઘટનાઓ હવે એક ચિંતાનો વિષય બન્યો છે. ખાસ કરીને અમદાવાદ જેવા મોટા શહેરોમાં આવી ઘટનાઓ વધુને વધુ પ્રકાશમાં આવતી હોય છે. શહેરમાં આવા વધતા જતા અકસ્માતના બનાવો ક્યારે અટકશે તે એક ગંભીર પ્રશ્ન બની ગયો છે. ત્યારે વધુમાં ફરી એક વાર શહેર મેમનગરમાં હિટ એન્ડ રનની ઘટના પ્રકાશમાં આવી છે.
પ્રાપ્ત રિપોર્ટ મુજબ, શહેરના મેમનગર વિસ્તારમાં એક હિટ એન્ડ રનની ઘટના પ્રકાશમાં આવી છે. અકસ્માતમાં કાર ચાલકે 5 થી 6 વાહનોને અડફેટે લીધા. આરોપી નશાની હાલતમાં હોવાનો સ્થાનિકોનો આરોપ છે. હિટ એન્ડ રનમાં 5થી 6 લોકોને પણ અડફેટે લઈ ઈજાગ્રસ્ત કર્યા. એક વૃદ્ધા ગંભીર રીતે ઘાયલ થયાનો દાવો છે. વધુ બે લોકોની હાલત પણ ગંભીર હોવાનો દાવો છે. આરોપીની કારમાં દારૂની બોટલ હોવાનો પ્રત્યક્ષદર્શીઓનો આરોપ છે.
આજે સોમવારના દિવસો સવારે લોકો નોકરી-ધંધા માટે જઈ રહ્યા હતા, ત્યારે મેમનગર વિસ્તારમાં પૂરપાટ ઝડપે આવી રહેલી બેકાબૂ અર્ટીગા કારના ચાલકે અનેક વાહનોને અડફેટે લીધા હતા. GJ 01 WA 5408 નંબરની અર્ટીગા કારના ચાલકે લોકોને ઉલાળ્યા હતા. કાર ચાલકે એક પછી એક 5 થી 6 વાહનોને અડફેટે લીધા હતા. જ્યારે 5 જેટલા લોકો ઈજાગ્રસ્ત થતાં 108 મારફતે તમામને સારવાર અર્થે ખસેડવામાં આવ્યા હતા.
બીજી બાજુ, કાર ચાલકે દારૂના નશામાં અકસ્માત સર્જ્યો હોવાનો સ્થાનિકોનો આરોપ છે. જ્યારે ઘટનાને પગલે મોટી સંખ્યામાં લોકો એકઠા થઈ ગયા હતા અને અફરાતફરીનો માહોલ સર્જાયો હતો. જ્યારે ઘટનાની જાણ થતાં જ પોલીસ ઘટના સ્થળે દોડી આવી હતી અને કાર ચાલકને ઝડપી પોલીસ સ્ટેશન લઈ જવામાં આવ્યો હતો.
નોંધનીય છે કે, રફતારના કહેરના કારણે અનેક ગંભીર અકસ્માતોની ઘટનાઓ બનતી હોય છે. ખાસ કરીને, નશાની હાલતમાં ગંભીર અકસ્માત સર્જનાર ચાલકોના લીધે નિર્દોષ રાહદારીઓને જીવ ગુમાવવાનો વારો આવતો હોય છે, ત્યારે અવારનવાર સામે આવતી આવી ઘટનાઓના પગલે રસ્તે જતાં રાહદારીઓમાં પણ ભયનો માહોલ જોવા મળતો હોય છે.