અમદાવાદ : અમદાવાદ મ્યુ કોર્પોરેશનની ઘાટલોડિયા વોર્ડની એક બેઠક પર પેટા ચૂંટણીમાં ભાજપના ઉમેદવાર પ્રવીણ પટેલનો જંગી બહુમતિથી વિજય થયો છે. બેઠક માટે થયેલા કુલ મતદાનના 91 ટકા મત ભાજપના ઉમેદવારને મળ્યા હતા. જેના પગલે કોંગ્રેસ સહિત બાકીના તમામ ઉમેદવારોની ડિપોઝિટ પણ જપ્ત થઈ છે. ઘાટલોડિયાની એક બેઠક માટે 31.26 ટકા મતદાન થયું હતું. જે પૈકી મોટાભાગના મત ભાજપની તરફેણમાં પડ્યા હતા. કુલ 24 હજાર કરતા વધુ મત સામે ભાજપના ઉમેદવારને 22 હજાર કરતા વધુ મત મળ્યા હતા. જ્યારે કોંગ્રેસના ઉમેદવારને માત્ર 1152 જ મત મળ્યા હતા.
અમદાવાદ મ્યુનિ. કોર્પોરેશનની ઘાટલોડિયા વોર્ડની એક બેઠક માટે રવિવારના રોજ મતદાન થયું હતું. જેમાં અપેક્ષા મુજબ મતદાન માટે મતદારો નિરસ જણાયા હતા. મતદાનની કાર્યવાહી પૂર્ણ થઈ ત્યાં સુધીમાં માત્ર 31.26 ટકા જેટલું જ મતદાન થયું હતું. આમ, ઘાટલોડિયા વોર્ડમાં નોંધાયેલા કુલ 78948 મતદારો પૈકી માત્ર 24621 મતદારોએ જ મતદાન કર્યું હતું. મતદાનના દિવસે જ કોંગ્રેસના ઉમેદવારે હાર સ્વીકારી લીધી હોય તેમ વોર્ડમાં કોંગ્રેસના કાર્યકરોને શોધવા પડે તેવી સ્થિતિ હતી. આમ, આ બેઠક પર ભાજપ એકતરફી જીત મેળવે તેવી મતદાનના દિવસથી જ શક્યતા જણાતી હતી અને તે મુજબનું જ પરિણામ પણ આવ્યું છે.
ભાજપના ઉમેદવારે કુલ મતદાનના 91 ટકા જેટલા મત મેળવ્યા હતા. જ્યારે બાકીના તમામ ઉમેદવારો અને નોટાને મળીને માંડ 9 ટકા મત મળ્યા હતા. આમ, આ બેઠક પર ભાજપના ઉમેદવારે નજીકના પ્રતિસ્પર્ધી એવા કોંગ્રેસના ઉમેદવાર કરતા 21201 મતની લીડથી વિજય મેળવ્યો હતો. આ જીત સાથે કોંગ્રેસ સહિતના તમામ ઉમેદવારોની ડિપોઝિટ પણ જપ્ત થઈ છે.
ભાજપના ઉમેદવારનો વિજય થતાં શહેરના મેયર પ્રતિભાબેન જૈન, સ્ટેન્ડિંગ ચેરમેન અને ડેપ્યુટી મેયર સાથે શુભેચ્છા મુલાકાત લીધી હતી.મુલાકાત દરમ્યાન કોર્પોરેશનની તમામ કાયદાકીય વિધિ પૂર્ણ કરવાની કામગીરી હાથ ધરવામાં આવી હતી.હવે મ્યુ કોર્પોરેશનની આગામી બોર્ડની બેઠકમાં તેઓ ભાગ લઈ શકશે.