મદાવાદ : અમદાવાદમાં સરખેજ-મકરબામાં મહમદપુરા રોડ પર ગેરકાયદેસર ચાલતા હુક્કાબાર પર PCBએ દરોડા પાડ્યા છે. બ્રુરોસ્ટ કાફેના નામે ચાલતું હતું ગેરકાયદેસર હુક્કાબાર. હૂક્કામાં અલગ અલગ ફ્લેવર્સમાં નિકોટીન સાથે આપવામાં આવતી હોવાની શક્યતા PCB એ વ્યક્ત કરી છે. FSLની મદદથી તપાસ કરવામાં આવશે. કાફેમાંથી મોટી માત્રામાં હૂક્કાઓ અને ફ્લેવર્સ કબજે કરવામાં આવ્યા છે.
પ્રાપ્ત રિપોર્ટ મુજબ, સરખેજ-મકરબામાં મહમદપુરા રોડ પર પ્રિવેન્શન ઓફ ક્રાઇમ બ્રાંચ (PCB) ટીમે રેડ કરી હુક્કાબાર પકડ્યું છે. બ્રુરોસ્ટ કેફેમાં આર્થિક ફાયદા માટે ગેરકાયદેસર હુક્કાબાર ચલાવાતું હોવાની હકીકત PCB ટીમને મળતા તાત્કાલિક રેડ કરવામાં આવી હતી.બ્રુરોસ્ટ કેફેમાં જુદા-જુદા હર્બલ ફ્લેવરની બદલે નિકોટીનયુક્ત ફ્લેવરના તમાકુવાળા હુક્કા ભરી ગ્રાહકોને પીવડાવવામાં આવતા હોવાની હકીકત મળતા રેડ કરવામાં આવી હતી. કેફેમાં બેઠેલા કેટલાક ગ્રાહકો ત્યાં હુક્કો લઈ બેઠેલા પોલીસને નજરે પડ્યા હતા. જોકે પોલીસ કાર્યવાહી અંગે ગ્રાહકોને ખ્યાલ આવતા હડકંપ મચ્યો અને ગ્રાહકો થોડીવારમાં છુમંતર થવા લાગ્યા હતા. પ્રાથમિક તબક્કે સંચાલકો દ્વારા ફ્લેવર્ડ હુક્કા હોવાનું કહેવામાં આવ્યું હતું. જોકે PCB ટીમે FSLની મદદ લઈ હુક્કાના ફ્લેવર ચકાસ્યા હતા. જેમાંથી નિકોટીનની માત્રાવાળા હુક્કા હોવાનું સામે આવતા કાર્યવાહી કરવામાં આવી હતી.
તમને જણાવી દઈએ કે છેલ્લા બે મહિનાથી બ્રુરોસ્ટ કેફેની આડમાં હુક્કાબાર ચાલતું હતું. કેફે સંચાલકોએ કેફે મેનેજર રાખ્યો હતો. ગ્રાહકોને અગવડતા ના પડે તે હેતુસર હુક્કો પીરસવા બે વેઇટરો રાખવામાં આવ્યા હતા. જે માત્ર હુક્કા અને નાસ્તો પીરસતા હતા. જ્યારે હુક્કો બનાવવા માટે કારીગર રાખવામાં આવ્યો હતો. કેફેના સંચાલન દિવ્યરાજસિંહ તથા અબ્દુલ હમીદ હોવાનું સામે આવતા બંને વિરુદ્ધ PCB એ કાયદેસર કાર્યવાહી હાથ ધરી હતી. જોકે બ્રુરોસ્ટ કેફેમાંથી અલગ અલગ હુક્કાબારના 41 ફ્લેવર પેકેટ, 30 જેટલા હુક્કા સહિત 47 હજારથી વધુનો મુદ્દામાલ કબ્જે કરવામાં આવ્યો હતો.
મુદામાલ :
(૧) હુક્કાબારના ફ્લેવર ના પેકેટ નંગ- 41 કુલ કિં.રૂ. 14,958/-
(૨) હુક્કો નંગ- 30 કિં.રૂ.30,000/-
(૩) ફોઇલ પેપર નંગ 2 કિ.રુ.00/-
(૩) ચીલમ નંગ-30 કિંમત રૂ.00/-
(૪) ચીપીયોનંગ-૦2 કિંમત રૂ.00/-
(૫) હુક્કાની પાઇપ નંગ 35 કિ.રુ.00/-
(૬) ફીલ્ટર નંગ 252 કિ.રુ.00/-
(૭) રોકડા રુપીયા 2250/-
(૮) બીલ બુક નંગ 2 કિ.રુ.૦૦/- મળી કુલ્લે કિ.રુ. 47,208/- ની મત્તાનો મુદ્દામાલ