અમદાવાદ : અમદાવાદમાં આવેલી સિવિલ હોસ્પિટલમાં માત્ર ગુજરાત જ નહીં અન્ય રાજ્યોના દર્દીઓ પણ સારવાર માટે આવતા હોય છે. દરરોજ આ હોસ્પિટલમાં મોટી સંખ્યામાં અલગ-અલગ સારવાર માટે લોકો પહોંચતા હોય છે. તેવામાં રાજ્ય સરકાર પણ આ હોસ્પિટલને આધુનિક બનાવી રહી છે. સિવિલ હોસ્પિટલ કેમ્પસમાં નવી હોસ્પિટલ બનાવવાનું કામ ચાલી રહ્યું છે. આ માહિતી આરોગ્યમંત્રી ઋષિકેશ પટેલે વિધાનસભામાં આવી છે.
વિધાનસભામાં પ્રશ્નોત્તરી કાળ દરમિયાન ધારાસભ્ય દિનેશસિંહ કુશવાહ દ્વારા અમદાવાદ સિવિલ મેડિસીટી કેમ્પસ ખાતે ચેપી રોગની હોસ્પિટલના નવા બાંધકામ સંદર્ભે પૂછેલા પ્રશ્નના ઉત્તરમાં આરોગ્યમંત્રી ઋષિકેશ પટેલે જણાવ્યું કે જુના ઈન-ડોર બ્લોક વોર્ડ, બ્લોક A થી D , અને ઓલ્ડ ટ્રોમા સેંટરના જુના મકાનો તોડી તેના સ્થાને નવીન ઓપીડી, 900 પથારીની નવીન જનરલ હોસ્પિટલ, 500 બેડની ઈન્ફેશ્યસ ડીસીઝ (ચેપીરોગના) દર્દીઓ માટે હોસ્પિટલ બાંધવાનું આયોજન હાથ ધરાયું છે.
આ કામગીરી માટે અંદાજીત કુલ રૂ. 588 કરોડની વહીવટી મંજૂરી અપાઇ છે. જેમાં અત્યાર સુધીમાં છેલ્લા ચાર વર્ષમાં તબક્કાવાર કુલ રૂ. 236.50 કરોડની બજેટ જોગવાઇ કરાઇ છે. નવી બનનાર 500 બેડની ચેપી રોગની હોસ્પિટલ તથા 900 બેડની જનરલ હોસ્પિટલમાં 300 બેડ આઇ.સી.યુ. અને સ્પેશિયલ રૂમ, વી.આઇ.પી. રૂમ મળી કુલ 2018 બેડ હોસ્પિટલ ઉપલબ્ધ થશે.
દસ માળની આ નિર્માણાધીન હોસ્પિટલમાં 555 ફોર વ્હીલર્સ અને 1000 ટુ વ્હીલર્સની ક્ષમતા ધરાવતું પાર્કીંગ, ચેપી રોગની અલાયદી ઓપીડી, ઓપરેશન થીયેટર તથા 115 બેડ જેમાં 15 બેડ ટી.બી આઈસીયુ બેડ, 300 આઈસીયુ બેડ પૈકી ચેપી રોગના 32 આઈસીયુ, 60 આઇસોલેશન રૂમની સુવિધા ઉપલબ્ધ બનશે.
અત્રે ઉલ્લેખનીય છે કે, સિવિલ મેડિસીટીના માસ્ટર પ્લાન તથા બજેટમાં મંજૂર થયેલ કામો પૈકી અત્યારસુધીમાં કુલ રૂ. 2590 કરોડના 35 કામો પૂર્ણ થયા છે તેમજ રૂ.131 કરોડના 3 કામો પ્રગતિ હેઠળ છે અને રૂ. 739 કરોડના કામો શરૂ થનાર છે. આમ સિવિલ મેડિસીટી ડેવલપમનેન્ટમાં અત્યાર સુધીમાં કુલ રૂ. 3460 કરોડના ખર્ચે અત્યાધુનિક સેવા-સુવિધાઓ ઉપલબ્ધ કરાવવામાં આવી રહી છે.
શું સુવિધાઓ ઉપલબ્ઘ થશે નવીન હોસ્પિટલમાં
• 555 ફોર વ્હીલર્સ અને 1000 ટુ વ્હીલર્સની ક્ષમતા ધરાવતું પાર્કીંગ
• ચેપી રોગની અલાયદી O.P.D.
• ઓપરેશન થીયેટર તથા 115 બેડ જેમાં 15 બેડ ટી.બી I.C.U બેડ
• 300 I.C.U બેડ પૈકી ચેપી રોગના ૩૨ I.C.U
• 60 આઇસોલેશન રૂમ