અમદાવાદ : અમદાવાદનાં સરખેજમાં આવેલી ફતેવાડી કેનાલ નજીક રીલ બનાવતા યુવકો કાર સાથે કેનાલમાં પડ્યા હતા. ત્રણ યુવકોએ સ્કોર્પિયો કાર ભાડેથી લઈને રીલ બનાવવા સારું ફતેવાડી કેનાલ આવ્યા હતા. કાર કેનાલમાં ખાબકતા સ્થાનિકોએ ફાયરને જાણ કરતા રેસ્ક્યુની કામગીરી હાથ ધરાઈ હતી. ફાયર બ્રિગેડ અને પોલીસને જાણ કરતા જમાલપુર, પ્રહલાદનગર અને અસલાલી ફાયર સ્ટેશનની રેસ્ક્યૂ ટીમ તાત્કાલિક ઘટનાસ્થળે પહોંચી. હાલ ફાયર બ્રિગેડની ટીમ દ્વારા સતત બચાવ કામગીરી ચાલી રહી છે.ઉલ્લેખનીય છે કે, સ્થાનિકો દ્વારા દોરડાની મદદથી ગાડીમાં રહેલા લોકોને શોધવાની કામગીરી શરૂ કરાઈ હતી.
પ્રાપ્ત રિપોર્ટ મુજબ, સાંજના સમયે વાસણા વિસ્તારમાં રહેતા હૃદય વયંતા, વેજલપુરના રહેવાસી સોલંકી ધ્રુવ અને ઋતાયુ સોલંકી રૂ. 3500ના ભાવે 4 કલાક માટે વાસણા બેરેજ તરફ રીલ બનાવવા માટે ગાડી લઈને ગયા હતા. વાસણા બેરેજના વિસ્તારમાં અગાઉથી જ તેમના મિત્રો પાલડી વિસ્તારમાં રહેતા વિરાજસિંહ રાઠોડ, આંબાવાડી વિસ્તારનાં યક્ષ ભંકોડિયા અને યશ સોલંકી તેમજ પાલડી ક્રિશ દવે ત્યાં હાજર હતા.મજા માણતી વખતે યશ ભંકોડિયા અને પછી યશ સોલંકીએ ગાડી ચલાવવાનું શરૂ કર્યું. ગાડી યુ-ટર્ન લેતી વખતે કોઈ કારણસર નિયંત્રણ ગુમાવતાં ગાડી સીધા કેનાલમાં ઘસી ગઈ.
વિરાજસિંહ રાઠોડ અને અન્ય મિત્રો દ્વારા દોરડું નાખી બચાવવાનો પ્રયાસ થયો, પરંતુ, ત્રણમાંથી એક પણ વ્યક્તિ દોરડું પકડી શક્યો નહોતા અને વહેતા પાણીમાં તણાઈ ગયા હતા. ફાયર બ્રિગેડની ટીમ સુરક્ષાના સાધનો સાથે આખી રાત સર્ચ ઓપરેશન ચલાવી રહી છે. કેનાલમાં પાણી છોડવાનું બંધ રાખવાથી પાણીનો સ્તર ઘટી રહ્યો છે, જેથી શોધખોળ સરળ બની રહી છે.
ફાયર બ્રિગેડની પ્રાથમિક માહિતી અનુસાર, કારમાં ત્રણ લોકો સવાર હતા. હાલમાં તેઓના પત્તા નથી લાગ્યા. ફાયર બ્રિગેડની અનેક ટીમો અને પોલીસ સાથે મળીને અલગ-અલગ જગ્યાએ શોધખોળ કરી રહી છે. કેનાલમાં સાઇફન તરફ પણ સર્ચ ઓપરેશન હાથ ધરાયું છે.
લાપતા બનેલા યુવકોના પરિવારજનો પણ ઘટનાસ્થળે પહોંચી ગયા છે અને તમામ લોકો આશાપૂર્વક બચાવ કામગીરી તરફ જોતા જોવા મળ્યા. ફાયર બ્રિગેડની ટીમ સતત પ્રયાસમાં છે કે યુવાનોને તાત્કાલિક શોધી બહાર લાવી શકાય.