અમદાવાદ : અમદાવાદીઓ અને બહારથી આવતા લોકો માટે હરવાફરવા માટેનું ફેવરિટ ડેસ્ટિનેશન હોય તો એ કાંકરિયા તળાવ છે. અહીં આવેલું બાલવાટિકા વર્ષોથી બાળકો માટે આકર્ષણનું કેન્દ્ર રહ્યું છે. એને હવે મહાનગરપાલિકાએ પીપીપી ધોરણે નવાં રંગરૂપ આપ્યાં છે. ગુજરાત અને ભારતમાં ન હોય એવી રાઈડ અને મ્યુઝિયમનો ઉમેરો કરવામાં આવ્યો છે.
પ્રાપ્ત રિપોર્ટ મુજબ, બાલવાટિકામાં સ્નોપાર્ક, ભૂલભુલૈયા, બટરફ્લાય પાર્ક, મડ બાઇકિંગ, વેક્સ મ્યુઝિયમ, ગ્લાસ ટાવર, ફ્લાઇંગ થિયેટર જેવા 22 આકર્ષણ હશે. વેક્સ મ્યુઝિયમમાં ક્રિકેટરો, ફિલ્મ સ્ટાર તેમજ દેશના મહાનુભાવોની મીણની મૂર્તિઓ જોવા મળશે.મહત્ત્વનું છે કે, 22 કરોડના ખર્ચે પીપીપી ધોરણે બાલવાટિકા તૈયાર કરાઈ છે. વેકેશનમાં બાળકો એમ્યુઝમેન્ટ પાર્કની મજા માણી શકશે. ટૂંક સમયમાં જ ટિકિટના દર પણ નક્કી કરાશે.કાંકરિયા બાલવાટિકા નવા રંગરૂપ સાથે 20 દિવસમાં ખુલ્લુ મુકાશે.
બાલવાટિકાનું નવીનીકરણ કરવામાં આવતાં અલગ જ લુકમાં જોવા મળશે, જેમાં અદ્યતન ડિઝાઇનવાળો એન્ટ્રી ગેટ જોવા મળશે. એન્ટ્રી ટિકિટની સાથે કેટલીક એક્ટિવિટી ફ્રી મળશે, જેમાં કોઈન હાઉસ કી, કાચ ઘર, શૂ હાઉસ, લેન્ડ સ્કેપ ગાર્ડન, સેલ્ફી ઝોન અને ગ્લોવ સ્ટેશનમાં કોઈપણ પ્રકારનો ચાર્જ લેવામાં આવશે નહીં. બીજી અલગ અલગ એક્ટિવિટી અને રાઇડ્સ માટે નક્કી કરવામાં આવેલા દર મુજબ લોકોએ ચાર્જ ચૂકવવો પડશે, જે ચાર્જ હવે પછી નક્કી કરાશે.
કાંકરિયાની બાલવાટિકામાં હવે વેક્સ મ્યુઝિયમ, ગ્લાસ ટાવર, ઇલ્યુઝન હાઉસ, ફ્લાઈંગ થિયેટર જેવી અલગ અલગ 28 એક્ટિવિટીનો સમાવેશ કરાયો છે. બાલવાટિકાના નવીનીકરણનું કામ હાલ અંતિમ તબક્કામાં છે, જે ટૂંક સમયમાં પૂર્ણ થયા બાદ 15 એપ્રિલ બાદ લોકો માટે ખુલ્લું મુકાશે.