અમદાવાદ : અમદાવાદમાં નગરજનોને સાબરમતી રિવરફ્રન્ટ પર વધુ એક નજરાણું મળવા જઈ રહ્યું છે. મ્યુનિ. સિંગાપોરની તર્જ પર 22 કરોડના ખર્ચે ટ્રોપિકલ ફોરેસ્ટ બનાવશે. ટ્રોપિકલ ફોરેસ્ટમાં એક વિશાળ ડોમમાં કૃત્રિમ વાતાવરણમાં આખું જંગલ ઊભું કરી, વાદળમાંથી વરસાદ થતો હોવાનું, ગાઢ ધુમ્મસનું વાતાવરણ જોવા મળશે. નાગરિકોને જમીનથી કેટલાક ફૂટ ઉપર બનાવેલા વોકવે પર ચાલવાનો અનુભવ મળશે. ટ્રોપિકલ ગાર્ડન હાલ સિંગાપોર-લંડનમાં છે.
પ્રાપ્ત રિપોર્ટ મુજબ, ટ્રોપિકલ ફોરેસ્ટમાં પ્રવાસીઓ માટે આકર્ષણ રૂપ ગ્લો ગાર્ડન, ચિલ્ડ્રન પાર્ક સહિત અનેક ગાર્ડન ઉપરાંત વધુ એક ટ્રોપિકલ ફોરેસ્ટ કૃત્રિમ વાતાવરણમાં ઊભું કરાશે. અતિ ભેજવાળા વાતાવરણમાં ઉછરતાં વૃક્ષ કે છોડ અહીં ઉછેરાશે. આ ટ્રોપિકલ ગાર્ડનને ક્લાઉડ ફોરેસ્ટ પણ કહે છે.ટ્રોપિકલ ફોરેસ્ટમાં ઉછેરાનારા તમામ છોડ કે વૃક્ષોને આર્ટિફિશિયલ લાઇટિંગની ગરમી આપી ઉછેરાશે. અહીં તમામ છોડને ઉછેરવા પાણી પૂરું પાડવાથી માંડી તમામ બાબતો માટે આર્ટિફિશિયલ ઇન્ટેલિજન્સનો ઉપયોગ કરાશે.
રિવરફ્રન્ટના પશ્ચિમ તરફ આવેલા સ્પોર્ટ્સ કોમ્પલેક્ષ પાસે આવેલી 7000 ચો.મી. જગામાં આ ટ્રોપિકલ ફોરેસ્ટ બનશે. જેમાં 1600 ચો.મી.માં આ ડોમ બનશે, જેમાં હેલિકોનિક્સ, એલોકેયસિય પસ્લ, ઓર્ચિડ્સ સહિતના વૃક્ષો હશે. મોટાભાગના વૃક્ષ અને છોડને કૃત્રિમ લાઈટિંગથી ગરમી આપવામાં આવશે.