અમદાવાદના રાણીપ સહિત આ વિસ્તારોમાં ફાયર સ્ટેશન બનાવવામાં આવશે, નવા પાર્ટી પ્લોટની પણ મંજૂરી

અમદાવાદ : શહેરમાં દિન પ્રતિદિન વધતા જતા વિસ્તાર અને લોકોની સુવિધાઓને ધ્યાનમાં રાખીને મ્યુનિસિપલ કોર્પોરેશન દ્વારા ફાયર સ્ટેશન અને પાર્ટી પ્લોટ બનાવવામાં આવશે. દર 10 કિલોમીટર વિસ્તારમાં એક ફાયર સ્ટેશન બનાવવામાં આવશે. રાણીપ, લાંભા, શાહીબાગ, રામોલ- હાથીજણ અને સાબરમતી રિવરફ્રન્ટના પશ્ચિમ કિનારે ફાયર સ્ટેશન બનાવવામાં આવશે. પાંચ ફાયર સ્ટેશન બનાવવામાં આવનાર છે. શહેરના ચાંદખેડા વિસ્તારમાં ત્રાગડ રોડ પર 2.50 કરોડના ખર્ચે નવો પાર્ટી પ્લોટ બનાવવામાં આવશે.

પ્રાપ્ત રિપોર્ટ મુજબ, શહેરના ગોતા અને ત્રાગડમાં નવા ફાયર સ્ટેશન બનાવવાની કામગીરી પૂરી થવાની તૈયારીમાં છે. પાંચકુવા અને દાણાપીઠ ફાયર સ્ટેશનના રીનોવશન- નવીનીકરણની કામગીરી ચાલી રહી છે. ચાલુ વર્ષે શહેરમાં 54 કરોડના ખર્ચે નવા પાંચ ફાયર સ્ટેશન બનાવવાનું આયોજન કરાયું છે. ફાયરમેનના ઇન્ટરવ્યુ પૂરા થતાં હવે ટુંક સમયમાં ભરતી પ્રક્રિયા પૂર્ણ કરવામાં આવશે. શહેરમાં હાલમાં કુલ 19 ફાયર સ્ટેશનોમાં 515 સ્ટાફ કાર્યરત છે. આશરે 1.50 કરોડના ખર્ચે વટવા જીઆઇડીસી ફાયર સ્ટેશનનું આયોજન છે. બીજા 100 કરોડના ખર્ચે નવા ફાયરના વાહન સહિત અન્ય વાહનોની ખરીદીનું આયોજન કરવામાં આવ્યું છે. નવા સાધનોની સાથે ભવિષ્યમાં ફાયરના સ્ટેશનો ઊભા થતાં સ્ટાફની પણ ભરતી કરવામાં આવશે.

ચાંદખેડામાં ત્રાગડ રોડ પર 2.59 કરોડના ખર્ચે નવો પાર્ટી પ્લોટ બનાવવામાં આવશે. ત્રાગડ રોડ પર TP- 69માં 5585 ચોરસ મીટરના ખુલ્લા પ્લોટમાં ઓપન પાર્ટી પ્લોટ બનાવવાની દરખાસ્ત મંજૂર કરાઈ છે. આ ઓપન પાર્ટી પ્લોટમાં 76 ટુ વ્હીલર અને 27 કાર પાર્કિંગની સુવિધા હશે. ઓપન પાર્ટી પ્લોટમાં 1500 વ્યક્તિની કેપિસિટી હશે તેમજ પાર્ટી લોન, સ્ટેજ, એન્ટરન્સ ફોયર, બાઈડ એન્ડ સૂમ રૂમ, એન્ટરન્સ પ્લાઝા વીથ સ્ટેચ્યુ, કિચન એરિયા અને વોટર એરિયા જેવી સુવિધા હશે. હાલ શહેરમાં 90 જેટલા કોમ્યુનિટી હોલ, પાર્ટી પ્લોટ અને ઓડિટોરિયમ આવેલા છે. જેમ AMCના હસ્તકમાં હાલમાં 34 પાર્ટી પ્લોટ, 2 ઓપન એર થિયેટર, 42 કોમ્યુનિટી હોલ અને 7 ઓડિટોરિયમ આવેલા છે. લગ્ન પ્રસંગ કે અન્ય પ્રસંગ માટે પાર્ટી પ્લોટ કે કોમ્યુનિટી હોલ ભાડેથી આપવામાં આવે છે.