અમદાવાદ : ઓસ્ટ્રેલિયામાં અભ્યાસ કરવાનું સ્વપ્ન જોતા હજારો વિદ્યાર્થીઓને ઝટકો લાગ્યો છે. ઓસ્ટ્રેલિયાએ યુપી અને બિહાર સહિત દેશના પાંચ રાજ્યોના વિદ્યાર્થીઓ માટે સ્ટડી વિઝા પર પ્રતિબંધ લગાવી દીધો છે. તેમજ તેમના પર વિઝા દસ્તાવેજોમાં છેતરપિંડી કરવાનો અથવા તો વિઝાનો દુરુપયોગ કરતા હોવાનો આક્ષેપ કરવામાં આવ્યા છે, આ ઉપરાંત એવો પણ આરોપ છે કે આ વિદ્યાર્થીઓ ઓસ્ટ્રેલિયામાં સ્ટડી વિઝા પર ફુલ ટાઈમ કામ કરી રહ્યા છે. યુપી અને બિહાર ઉપરાંત, જે રાજ્યો પર પ્રતિબંધ મૂકવામાં આવ્યો છે તેમાં પંજાબ, હરિયાણા અને ગુજરાતના વિદ્યાર્થીઓનો સમાવેશ થાય છે. બે વર્ષ પહેલાં પણ ઓસ્ટ્રેલિયાએ આ પાંચ રાજ્યો પર પ્રતિબંધ લાદ્યો હતો, જો કે, પછીથી તેમાં છૂટછાટ આપવામાં આવી હતી.
અમેરિકા અને કેનેડામાં વિઝા પ્રતિબંધોને કારણે, મોટાભાગના ભારતીય વિદ્યાર્થીઓ ઓસ્ટ્રેલિયા તરફ વળી રહ્યા હતા. હકીકતમાં, અમેરિકામાં ભારતીય વિદ્યાર્થીઓના વિઝા અસ્વીકારનું પ્રમાણ વધીને 24 ટકા થયું છે, જે છેલ્લા દાયકામાં સૌથી વધુ છે. કેનેડામાં પણ આવી જ પરિસ્થિતિ છે. આવી સ્થિતિમાં, ભારતીય વિદ્યાર્થીઓ ઓસ્ટ્રેલિયામાં અભ્યાસ કરવાની આશા રાખતા હતા, પરંતુ હવે તેમને ત્યાંથી પણ મોટો આંચકો લાગ્યો છે. એસોસિએશન ઓફ ઓસ્ટ્રેલિયન એજ્યુકેશન રિપ્રેઝન્ટેટિવ્સ ઇન ઇન્ડિયા (AAERI) એ ભારતના મિત્ર દેશોમાંના એક ઓસ્ટ્રેલિયાના આ પગલાને ખોટું ગણાવ્યું છે અને કહ્યું છે કે જો ઓસ્ટ્રેલિયાએ આ કરવું જ પડે, તો કેસ-બાય-કેસ આધારે મૂલ્યાંકન કરવું જોઈએ.
બિહાર, ઉત્તર પ્રદેશ, હરિયાણા, પંજાબ અને ગુજરાતના વિદ્યાર્થીઓ માટે વિઝા પર પ્રતિબંધ મૂકવા માટે ઓસ્ટ્રેલિયન યુનિવર્સિટીઓ દ્વારા આપવામાં આવેલ તર્ક એ છે કે આ રાજ્યોના વિદ્યાર્થીઓ પૂર્ણ-સમય અભ્યાસ માટે દેશમાં આવે છે, પરંતુ અહીં તેઓ વ્યાવસાયિક અભ્યાસક્રમોમાં પ્રવેશ લે છે, કેટલાક વિદ્યાર્થીઓ અભ્યાસ પણ કરતા નથી અને ફક્ત અહીં કામ કરવા માટે વિઝા લે છે. આનાથી યુનિવર્સિટીઓની વિઝા મંજૂરી પર નકારાત્મક અસર પડી રહી છે. તેમની પ્રતિષ્ઠાને પણ નુકસાન થઈ રહ્યું છે અને સંસ્થાઓની નાણાકીય સ્થિતિ પણ કથળી રહી છે.
ઓસ્ટ્રેલિયાની ઘણી સંસ્થાઓ, જેમાં વિક્ટોરિયા યુનિવર્સિટી, વેસ્ટર્ન સિડની યુનિવર્સિટી, એડિથ કોવાન યુનિવર્સિટી, વોલોંગોંગ યુનિવર્સિટી, ટોરેન્સ યુનિવર્સિટીનો સમાવેશ થાય છે, તેમણે આ પાંચ રાજ્યોના વિદ્યાર્થીઓ માટે અરજી પ્રક્રિયા બંધ કરી દીધી છે અથવા તેના પર કડક નિયંત્રણો લાદ્યા છે. આ પહેલા પણ એડિથ કોવાન યુનિવર્સિટીએ ફેબ્રુઆરી 2023માં પંજાબ અને હરિયાણાના વિદ્યાર્થીઓ પર સંપૂર્ણ પ્રતિબંધ લાદી દીધો હતો. વિક્ટોરિયા યુનિવર્સિટીએ યુપી, રાજસ્થાન અને ગુજરાત સહિત ભારતના આઠ રાજ્યોના વિદ્યાર્થીઓ પર પ્રતિબંધ મૂક્યો હતો.
આ નિર્ણય પાછળ, ઓસ્ટ્રેલિયન સરકારે સ્પષ્ટતા કરી છે કે તે કોઈપણ દેશના વિદ્યાર્થીઓ પર પ્રતિબંધો લાદતી નથી. આ યુનિવર્સિટીઓનો નિર્ણય છે; તેમને પોતાના જોખમ વ્યવસ્થાપનના આધારે આવા નિર્ણયો લેવાની સ્વતંત્રતા છે. ઓસ્ટ્રેલિયન હાઈ કમિશનર બેરી ઓ’ફેરેલે અગાઉ વિદ્યાર્થીઓને સ્થળાંતર એજન્ટોના પ્રભાવ હેઠળ ખોટી માહિતી સાથે અરજી ફોર્મ ભરવા સામે ચેતવણી આપી હતી.