અમદાવાદ: ડમી વિદ્યાર્થીઓને લઈને સીબીએસઈ બોર્ડની તપાસ બાદ હવે અમદાવાદ ગ્રામ્ય જિલ્લા શિક્ષણાધિકારી દ્વારા સ્કૂલોને પરિપત્ર કર્યાે છે.જિલ્લા શિક્ષણ અધિકારીઓએ તમામ શાળાઓને ઉદ્દેશીને એક પરિપત્ર કર્યો છે અને આ મામલે કડક સૂચનો કર્યા છે.શાળામાં વિદ્યાર્થીનું માત્ર નામ બોલતું હોય અને વિદ્યાર્થી પોતે કોચિંગ ક્લાસમાં ભણવા જતો હોય એ પ્રકારનું કૌભાંડ છડે ચોક ચાલી રહ્યું છે. શાળામાં વિદ્યાર્થીઓ ગેરહાજર હોવા છતાં હાજરી પૂરાઈ રહી હોવાની અનેક ફરિયાદોને પગલે અમદાવાદ ગ્રામ્ય જિલ્લા શિક્ષણ અધિકારી એક્શન મોડમાં આવ્યા છે.
પ્રાપ્ત રિપોર્ટ મુજબ, અમદાવાદ ગ્રામ્ય જિલ્લા શિક્ષણાધિકારી કૃપા જ્હાએ તાબા હેઠળની તમામ બોર્ડની સ્કૂલોને વિદ્યાર્થીઓની હાજરીને લઈને પરિપત્ર કર્યાે છે. જેમાં જણાવાયું છે કે, જિલ્લામાં ગુજરાત બોર્ડ સિવાયની સીબીએસઈ તેમજ અન્ય બોર્ડ સાથે એફિલિયટેડ થયેલી શાળાઓમાં નવા સત્રની શરૂઆત થયેલી છે. જ્યારે ગુજરાત બોર્ડની સ્કૂલોમાં આગામી સમયમાં પ્રવેશ પ્રક્રિયા શરૂ થશે. જેથી તમામ સ્કૂલોએ શાળામાં નિયમિત હાજરીને લઈને નિયમોની અમલવારી કરવાની રહેશે.
શાળાઓમાં વિદ્યાર્થીઓ ગેરહાજર હોવા છતાં હાજરી પૂરાઈ રહી હોવાની ફરિયાદો ઉઠી હતી. મુખ્યત્વે ધોરણ 11-12ના વિદ્યાર્થીઓ JEE, NEET પરીક્ષાની તૈયારીઓ માટે શાળાએ આવવાનું ટાળતા હોય છે. કેટલીક શાળાઓમાં વિદ્યાર્થીઓ ન આવતા હોવા છતાં ચોપડે હાજરી પૂરાતી હતી. શાળાઓમાં ચાલતી આ પ્રકારની બેદરકારી હવે નહીં ચલાવી લેવાય. તે મામલે જિલ્લા શિક્ષણ અધિકારીએ તમામ શાળાઓને ઉદ્દેશીને એક પરિપત્ર જાહેર કર્યો છે.
નવું શૈક્ષણિક સત્ર શરૂ થાય તે પહેલાં શાળાઓને સ્પષ્ટ સૂચનાઓ આપવામાં આવી છે. જેમાં મુખ્ય આદેશો મુજબ…
શાળાઓમાં વિદ્યાર્થીઓની 80% હાજરી ફરજિયાત છે.
દરરોજ ઓછામાં ઓછું 5 કલાક શૈક્ષણિક કાર્ય થવું જરૂરી છે.
શાળાઓમાં નિયમિત સરપ્રાઈઝ ચેકિંગ કરવામાં આવશે.
હાજરીમાં અનિયમિતતા જણાય તો શાળાની માન્યતા રદ થઈ શકે છે.
કોઈપણ શાળા ખાનગી કોચિંગ ક્લાસ ચલાવી શકશે નહીં.
DEO ટીમ દ્વારા શાળાઓમાં નિયમિત ચકાસણી કરવામાં આવશે, અને જો કોઈ શાળા નિયમોનું પાલન નહીં કરે તો સખત કાર્યવાહી કરવામાં આવશે. આ પરિપત્રનો હેતુ શાળાઓને આગામી શૈક્ષણિક સત્રથી જ નિયમોનું ચુસ્તપણે પાલન કરાવવાનો છે. DEOના આ પગલાંથી શાળાઓમાં શિસ્ત અને જવાબદારી વધશે તેવી આશા છે. વાલીઓ અને વિદ્યાર્થીઓને પણ અપીલ કરવામાં આવી છે કે તેઓ શાળાની નિયમિત હાજરી અને શૈક્ષણિક પ્રક્રિયામાં સહયોગ આપે.