અમદાવાદ : પ્રદેશ ભાજપ દ્વારા રાજ્યમાં વિવિધ શહેરોના પ્રમુખની જાહેરાત કરવામાં આવી છે. ગુજરાત ભાજપ દ્વારા બાકી રહેલા શહેર-જિલ્લા પ્રમુખોની જાહેરાત કરવામાં આવી રહી છે. જેમાં અમદાવાદ, ગાંધીનગર, પોરબંદર અને પંચમહાલ ભાજપના જિલ્લા પ્રમુખોની વરણી કરવામાં આવી છે. વડોદરા જિલ્લા ભાજપ અધ્યક્ષપદે રસિક પ્રજાપતિના નામની જાહેરાત કરવામાં આવી છે. અમદાવાદ શહેર ભાજપ પ્રમુખ તરીકે પ્રેરક શાહની નિમણુંક કરવામાં આવી છે.
પ્રાપ્ત વિગતો મુજબ, અમદાવાદ શહેર ભાજપ પ્રમુખ તરીકે નવનિયુક્ત પ્રેરક શાહની વાત કરીએ તો ગુજરાત પ્રદેશના સહપ્રવક્તા આર્થિક સેલના પ્રદેશ સંયોજક, ભાજપના ફેમસ મીડિયા એક્સપર્ટ, ફાઇનાન્સિયલ એક્સપર્ટ અને પ્રખર વિદ્વાન વક્તા તરીકે ગણના થાય છે. કેન્દ્ર સરકારનું બજેટ હોય કે રાજ્ય સરકારનું બજેટ ભાજપ તરફથી ફાઇનાન્સિયલ એક્સપર્ટ પ્રેરક શાહ વિરોધીઓને આંકડાકીય માહિતી સાથે અભ્યાસું તરીકે પોતાની વાત રજુ કરવામાં જાણીતા છે.
આ ઉપરાંત ગાંધીનગર મહાનગર ભાજપ અધ્યક્ષની પણ જાહેરાત કરવામાં આવી છે. આશિષ દવેની ગાંધીનગર મહાનગર ભાજપ અધ્યક્ષ તરીકે વરણી કરવામાં આવી હતી.આશિષ દવે GUDAના ચેરમેન રહી ચુક્યા છે. આશિષ દવે સ્ટેન્ડિંગ કમિટીના ચેરમેન પણ હતા.પોરબંદર જિલ્લા ભાજપના પ્રમુખ તરીકે ડૉ. ચેતનાબેન તિવારી (રૂપારેલ)ની નિમણૂંક કરવામાં આવી છે. ભારતીય જનતા પાર્ટીએ ખેડા જિલ્લાના પ્રમુખ તરીકે નયનાબેન પટેલની નિમણૂક કરવામાં આવી છે.પંચમહાલ જિલ્લા ભાજપ પ્રમુખ તરીકે મયંક દેસાઇની વરણી કરવામાં આવી છે.