અમદાવાદ : દેશભરમાં મોકડ્રીલ વચ્ચે અમદાવાદમાં મોટી ઘટના બની છે. નરેન્દ્ર મોદી સ્ટેડિયમને બોમ્બથી ઉડાવી દેવાની ધમકી મળી છે. ધમકીને પગલે અમદાવાદ પોલીસના ઉચ્ચ અધિકારીઓની ટીમ અને બોમ્બ સ્કવોડનું સ્ટેડિયમમાં ચેકિંગ હાથ ધરાયું છે. પાકિસ્તાનના નામથી GCAને ધમકીભર્યો ઈ-મેઇલ મળ્યો છે.
પ્રાપ્ત રિપોર્ટ મુજબ, અમદાવાદના નરેન્દ્ર મોદી સ્ટેડિયમને બોમ્બથી ઉડાવી દેવાની ધમકી મળી હતી. GCA (ગુજરાત ક્રિકેટ એસોસિએશન)ને પાકિસ્તાનના નામથી ઇમેલ મળ્યો હતો જેમાં નરેન્દ્ર મોદી સ્ટેડિયમને બોમ્બથી ઉડાવી દેવાની ધમકી આપવામાં આવી હતી. આ ધમકી મળતા જ પોલીસને જાણ કરવામાં આવી હતી. તે બાદ પોલીસના ઉચ્ચ અધિકારીઓનો કાફલો, બોમ્બ સ્કવોર્ડ-ડોગ સ્કવોર્ડ સાથે સ્ટેડિયમમાં પહોંચી હતી અને તપાસ હાથ ધરી હતી.
નરેન્દ્ર મોદી સ્ટેડિયમમાં અત્યારે IPL 2025ની મેચ રમાઇ રહી છે. નરેન્દ્ર મોદી સ્ટેડિયમ ગુજરાત ટાઇટન્સનું હોમગ્રાઉન્ડ છે. હવે આ સ્ટેડિયમમાં 14 મેએ લખનૌ સુપરજાયન્ટ સામે ગુજરાત ટાઇટન્સની મેચ રમાશે જ્યારે 18 મેએ ચેન્નાઇ સુપરકિંગ્સ સામે અંતિમ મેચ રમાશે.