અમદાવાદ: શહેરમાં વધુ એક હિટ એન્ડ રનની ઘટના સામે આવી છે. શહેરના નારણપુરાના અંજલી ક્રોસ રોડ પાસે મહિલા કાર ચાલકે બાઈક પર સવાર બે યુવાનોને અડફેટે લીધા હતા. આ ગોઝારા અકસ્માતમાં એક યુવાનનું મોત નીપજ્યુ છે જ્યારે અન્ય યુવાન ગંભીર રીતે ઇજાગ્રસ્ત થયો છે. આ બંન્ને યુવાન ગીરસોમનાથના વતની હોવાનું સામે આવ્યું છે. આ અકસ્માત કરીને મહિલા કાર ચાલક ફરાર થઈ ગઈ હતી. હાલ સ્થાનિક પોલીસે આ અંગે વધુ તપાસ શરૂ કરી છે. કારના નંબર પરથી તેના માલિક સુધી પહોંચવાનો પ્રયાસ થઈ રહ્યો છે.
પ્રાપ્ત રિપોર્ટ મુજબ,મંગળવારે મોડી રાત્રે નારણપુરા અંજલી ક્રોસ રોડ પાસે ઉપરથી એક સફેદ રંગની ક્રેટા કારનો નંબર GJ01 WF 8540 પૂરઝડપે પસાર થઈ રહી હતી. ગાડી ચાર રસ્તા ઉપર આવતાની સાથે જ ગાડીએ સામેથી બાઈક ઉપર આવી રહેલા બે યુવકોને અડફેટે લીધા હતા. જોકે ગાડીની સ્પીડ એટલી બધી હતી કે બાઈક ગાડીની અંદર જ ઘૂસી ગયું હતું અને બંને યુવાનો ગંભીર રીતે ઇજાગ્રસ્ત થયા હતા .108ની ટીમે ઘટના સ્થળે આવીને તપાસ કરતા બેમાંથી એક યુવક મૃત્યુ પામ્યો હતો. જ્યારે અન્ય એક ને ગંભીર હાલતમાં હોસ્પિટલમાં લઈ જવાયો હતો.
અક્સ્માત બાદ મહિલા કાર છોડીને ફરાર થઈ ગઈ હતી. મળતી માહિતી પ્રમાણે, આ બંને યુવાનો મૂળ ગીર સોમનાથ જિલ્લાના વતની હોવાનું સામે આવ્યુ છે. ગીર સોમનાથના આર્યન બારડ અને બ્રિજેશ ડોડીયા બાઇક પર સવાર હતા.
થોડા સમય પહેલા પણ અમદાવાદમાં હિટ એન્ડ રનની ઘટના બની હતી. જેમાં બાપુનગરમાં હિટ એન્ડ રનની ઘટના સર્જાઈ હતી. જેમાં નિકોલના રહેવાસી નિવૃત્ત વિક્રમસિંહ ઝાલા (ઉં.વ. 64) વહેલી સવારે પોતાના નિયમિત સમયે ચાલવા માટે બહાર નીકળ્યા હતા. બાપુનગર ખાતે આવેલા BRTS એપ્રોચ રોડની રેલિંગમાં વિક્રમસિંહ ચાલીને જઈ રહ્યા હતા, ત્યારે તેમને એક પૂર ઝડપે આવેલાં મોટરસાઇકલ ચાલકે ટક્કર મારી હતી. આ ઘટનામાં વિક્રમસિંહ નીચે પટકાયા હતા, એટલાં નજીકના લોકોએ તેમને તાત્કાલિક હોસ્પિટલમાં ખસેડ્યા હતા. પરંતુ સારવાર દરમિયાન તેમનું મોત નીપજ્યું હતું.