અમદાવાદ : અમદાવાદમાં AMTS બસના બે અલગ-અલગ અકસ્માત સર્જાયા છે. આ અકસ્માતમાં 15 મુસાફરોને નાની-મોટી ઇજા પહોંચી છે. દિલ્હી દરવાજા પાસે બે AMTS બસ વચ્ચે અકસ્માત સર્જાતા 3 મહિલાને સારવારમાં ખસેડવાની ફરજ પડી હતી. જ્યારે કાલુપુર બ્રિજ પાસેના અકસ્માતમાં બસની પાછળ ટેમ્પો ઘૂસી જતા ટેમ્પોચાલક ઇજાગ્રસ્ત થયો છે.
પ્રાપ્ત રિપોર્ટ મુજબ, પ્રથમ અકસ્માતની ઘટનામાં શહેરના દિલ્હી દરવાજા પાસે બપોરના સમયે AMTS બસ જઈ રહી હતી, એક બાઈક ચાલક અચાનક આગળ આવી જતા પાછળથી આવી રહેલ અન્ય બસ સાથે ટકરાઈ હતી. બે બસ વચ્ચેના અકસ્માતમાં બસમાં બેઠેલા 15 જેટલા પેસેન્જરને નાની-મોટી ઈજા પહોંચી છે. જોકે, 3 મહિલાને વધુ ઇજા પહોચતા સારવાર માટે હોસ્પિટલ ખસેડવામાં આવી છે. આ અંગે પોલીસને કોઈ ફરિયાદ મળી નથી.
બીજી અકસ્માતની ઘટનામાં કાલુપુર બ્રિજ પર બપોરના સમયે AMTS બસ પસાર થઈ રહી હતી. ત્યારે પાછળથી લોડિંગ ટેમ્પો આવી રહ્યો હતો, જે બસમાં પાછળ ઘૂસી ગયો હતો. લોડિંગ ટેમ્પો ચાલકને અકસ્માતમાં ઇજા પહોંચી હતી. બનાવને કારણે બ્રિજ પર ટ્રાફિકજામ પણ થયો હતો. બનાવની જાણ થતા પોલીસ સ્થળ પર પહોંચીને કાર્યવાહી શરૂ કરી છે.
તમને જણાવી દઈએ કે AMTS બસોના ધણા ડ્રાઇવરો શિખાઉ અથવા લાયસન્સ ધરાવતાં નથી. ચાલુ બસે મોબાઈલ પર વાતો કરતાં હોય છે. દારૂ પીને બસો ચલાવતાં હોય છે. જેથી અસામાન્ય વધુ સ્પીડમાં ડ્રાઇવર દ્વારા કંટ્રોલ ના થતો હોઈ અકસ્માત કરી બેસે તેવી ઘટના અવારનવાર બનવા પામે છે તેમ છતાં સત્તાધારી AMTS ના હોદ્દેદારો મળતીયા કોન્ટ્રાકરોને છાવરે છે શા માટે?