અમદાવાદ: માતા-પિતા માટે લાલબત્તી સમાન કિસ્સો સામે આવ્યો છે. નવ માસનું બાળક રમકડાના મોબાઇલનો એલઇડી બલ્બ ગળી જતા બલ્બ શ્વાસ નળીમાં ફસાઇ ગયો હતો. અમદાવાદ સિવિલ હોસ્પિટલના બાળરોગ સર્જનોએ સફળ સર્જરી કરી બલ્બ બહાર કાઢ્યો હતો. વારંવાર બનતા આવા કિસ્સાઓ ઉપરથી માતાપિતા અને પરિવારજનોએ સબક લઇ વધુ સાવચેત રહેવાની જરુર છે.
પ્રાપ્ત રિપોર્ટ મુજબ, કારપેન્ટરનુ કામ કરતા જુનાગઢના રહેવાસી એવા જુનેદ યુસુફ અને તબસ્સુમબેનના 9 માસના નાનકડા પુત્ર મોહમ્મદને છેલ્લા 15 દિવસથી ઉધરસ આવતી હતી. જુનાગઢમાં બાળરોગ તજજ્ઞને બતાવતા તેનો છાતીનો એક્સરે કરાવતા તેમાં શ્વસનનળીમાં કાંઈક ફસાયું હોવાનું જાણવા મળ્યું.જુનેદને રાજકોટની ખાનગી હોસ્પિટલ દ્વારા વધુ તપાસની ભલામણ કરી, જોકે તેનો ખર્ચ તેમને પોષાય તેમ ન હોવાથી તે સિવિલ હોસ્પિટલ અમદાવાદ આવી પહોંચ્યા હતા
સારવાર અર્થે 3 જૂન, 2025ના રોજ બાળકને પીડીયાટ્રીક સર્જરી વિભાગમાં તાત્કાલિક દાખલ કર્યો હતો. સિવિલ હોસ્પિટલ, અમદાવાદના પીડિયાટ્રિક સર્જરી વિભાગના વડા ડૉ. રાકેશ જોશી તેમજ એનેસ્થેસિયા વિભાગના પ્રોફેસર ડૉ. નિલેશ અને તેમની ટીમ દ્વારા બાળકની બ્રોન્કોસ્કોપી કરી જમણી તરફની મુખ્ય શ્વાસનળીમાંથી એક એલઇડી બલ્બ સફળતાપૂર્વક બહાર કાઢવામાં આવ્યો. ઓપરેશન પછી બાળકની તબિયત ઝડપથી સુધરી રહી છે અને કોઈપણ બીજી તકલીફ વગર બાળક હવે સ્વસ્થ છે જેથી ટૂંક સમયમાં તેને હોસ્પિટલમાંથી રજા આપવામાં આવશે તેમ ડોક્ટરોએ જણાવ્યું હતું.
અમદાવાદ સિવિલના ડોક્ટરોની નિપુણતા-નિષ્ઠાપુર્વકની સારવારનો આ કિસ્સો ગરીબ દર્દીઓ માટે ઉપલબ્ધ સસ્તી અને ઉતમ સારવારનું જીવંત ઉદાહરણ છે. ડોક્ટરએ બાળરોગ સર્જરી સપ્તાહ વિશે જણાવતા કહ્યું કે, બાળરોગ સર્જરી સપ્તાહ એ ઇન્ડિયન એસોસિએશન ઓફ પીડિયાટ્રિક સર્જન્સ દ્વારા બાળરોગ અંગેની સર્જિકલ બિમારીઓ અને તેની સારવાર વિશે જાગૃતિ લાવવાની એક વાર્ષિક પહેલ છે. જે દર વર્ષે જૂન મહીનામાં ઉજવવામાં આવતી હોય છે.