અમદાવાદ : અમદાવાદના રહેવાસીઓ માટે હવે ઘર, મકાન કે ઓફિસ ખરીદવી મોંઘી બનશે. અમદાવાદ શહેરી વિકાસ સત્તામંડળ (AUDA) એ 40 વર્ષમાં પહેલી વાર જમીન અને બાંધકામ પર વિકાસ ફી વધારવાનો નિર્ણય લીધો છે. આજે મંગળવારે મળેલી AUDA બોર્ડની બેઠકમાં રહેણાંક, બિન-રહેણાંક અને અન્ય હેતુઓ માટે જમીન અને બાંધકામ પર વિકાસ ફીમાં 10 ગણો વધારો કરવાનો નિર્ણય લેવામાં આવ્યો હતો અને પ્રસ્તાવિત વધારા સાથે રાજ્ય સરકારને દરખાસ્ત મોકલવામાં આવી છે. રાજ્ય સરકાર દ્વારા દરખાસ્તને મંજૂરી મળતાં, નવી વિકાસ ફી અમદાવાદ શહેરમાં થઈ રહેલા તમામ બાંધકામો પર લાગુ થશે.
પ્રાપ્ત રિપોર્ટ મુજબ, અમદાવાદ મ્યુનિસિપલ કોર્પોરેશન અને અમદાવાદ શહેરી વિકાસ સત્તા મંડળ હેઠળ આવતા વિસ્તારમાં જ્યારે કોઈપણ બિલ્ડર કે ડેવલપર દ્વારા બાંધકામ યોજના મંજુર કરવા માટે મુકશે તેમાં ડેવલપમેન્ટ ચાર્જ ભરવાનો આવતો હોય છે. જેમાં 10 ગણો વધારો કરી હવેથી પ્રતિ ચોરસ મીટર લેખે 25 રૂપિયાથી લઈને 75 રૂપિયા સુધીનો ભાવ નક્કી કરવામાં આવ્યો છે. જમીન અને બાંધકામ બંને માટે અલગ અલગ દર નક્કી કરવામાં આવ્યા છે. અત્યાર સુધી પ્રતિ ચોરસ મીટર લેખે 4થી લઈને 15 રૂપિયા સુધીનો ચાર્જ લેવામાં આવતો હતો. જેમાં 10 ગણો જેટલો વધારો કરવામાં આવ્યો છે. 40 વર્ષથી વધુ સમય બાદ આ ડેવલોપમેન્ટ ચાર્જમાં વધારો કરવામાં આવ્યો છે.
જો ડેવલપમેન્ટ ચાર્જ વધશે તો બિલ્ડિંગ પ્રોજેક્ટ્સ મોંઘા થશે. જેના કારણે પ્રોપર્ટીના ભાવ વધશે. AUDA દ્વારા ડેવલપમેન્ટ ચાર્જ વધારવાનો પ્રસ્તાવ મૂકવામાં આવ્યો છે, જે સમગ્ર અમદાવાદ શહેરમાં લાગુ થશે. આગામી દિવસોમાં જંત્રી દર વધારવાનો નિર્ણય લેવામાં આવશે અને જો રાજ્ય સરકાર AUDA દ્વારા ડેવલપમેન્ટ ચાર્જ પણ વધારશે તો પ્રોપર્ટીના ભાવ ઘણા વધી જશે. અમદાવાદ શહેરની આસપાસના બિલ્ડિંગ પ્રોજેક્ટ્સ અને જમીનના ભાવ વધશે. જેના કારણે લોકોનું ઘર ખરીદવાનું સ્વપ્ન પણ ચકનાચૂર થઈ જશે. અગાઉ, સાત વર્ષ પહેલાં, AUDA દ્વારા ડેવલપમેન્ટ ચાર્જ વધારવાનો પ્રસ્તાવ મૂકવામાં આવ્યો હતો, પરંતુ રાજ્ય સરકારે કોઈ નિર્ણય લીધો ન હતો.
