અમદાવાદ : અમદાવાદીઓ માટે મહત્વના સમાચાર આવી રહ્યા છે, હવે શહેરના નાગરિકો પોતાના મકાનનું બાંધકામ, રીનોવેશન તેમજ વધારાનું બાંધકામ થયેલી મિલકતનું ટેક્સ માટે સેલ્ફ એસેસમેન્ટ કરી શકે છે. અમદાવાદ મ્યુનિસિપલ કોર્પોરેશનની વેબસાઈટ ઉપરથી મિલકતનું સેલ્ફ એસેસમેન્ટ કરી શકશે અને તેમને કેટલો ટેક્સ આવશે તેની જાણકારી મેળવી શકે છે. સોફ્ટવેરમાં માહિતી અપલોડ કર્યા બાદ મ્યુનિસિપલ કોર્પોરેશનના ટેક્સ વિભાગના ઇન્સ્પેક્ટર દ્વારા સ્થળ તપાસ કરી અને તેને ફાઇનલ કરશે. રીનોવેશન અને વધારાના બાંધકામ બાદ કેટલીક જગ્યાએ આકારણી અંગે ફરિયાદો મળતી હતી જેના નિવારણ માટે ઓનલાઇન સિસ્ટમ કાર્યરત થઈ છે.
પ્રાપ્ત રિપોર્ટ મુજબ, અમદાવાદ મ્યુનિસિપલ કોર્પોરેશને (AMC) એ નવી એપ્લિકેશન કાર્યરત કરી છે.શહેરના રહીશો તેમની મિલકતની જાતે આકારણી કરી શકશે. મ્યુનિસિપલ કોર્પોરેશનની વેબસાઈટ ઉપર જઈ જરુરી તમામ વિગત અપલોડ કરવાની રહેશે.શહેરના સાત ઝોનમાં દર ચાર વર્ષે આકારણી કરાતી હોય છે. આમ છતાં આ સમય દરમિયાન બનેલા નવા મકાનોની આકારણી કરાતી નહીં હોવાની ફરિયાદ સામે આવતી હોય છે.આ સમસ્યાના નિરાકરણ માટે નવી એપ્લિકેશન કાર્યરત કરાઈ છે.
રેવન્યુ કમિટીના ચેરમેન અનિરુધ્ધસિંહ ઝાલા અને ડેપ્યુટી ચેરમેન પ્રદીપ દવેના જણાવ્યા મુજબ, નાગરિક દ્વારા અપલોડ કરવામાં આવેલી વિગતના આધારે તેને તેનુ અંદાજિત પ્રોપર્ટી ટેકસનુ બિલ મળી જશે.સાત દિવસની અંદર મ્યુનિસિપલ કોર્પોરેશનના ટેકસ વિભાગના કર્મચારી જે તે અરજદારના ઘરે જઈ તમામ દસ્તાવેજની ચકાસણી કરશે એ પછી અરજદારને પાકુ ટેકસ બિલ મળશે.જે લોકો સત્વરે તેમની મિલકતની આકારણી કરવા માંગતા હોય તેમના માટે આ એપ્લિકેશન મદદરુપ બનશે.
નાગરીકે જાતે જ ઓનલાઈન દસ્તાવેજ, મિલકતનો પ્રકાર સહીતની વિગત વેબસાઈટ ઉપર અપલોડ કરશે કે તરત જ એક બિલ જનરેટ થશે.આ માટે જગ્યાનુ નિશ્ચિત માપ,વપરાશનો પ્રકાર જેવી વિગત દર્શાવવી પડશે.સ્થળ તપાસ પછી વપરાશના ક્ષેત્રફળ, ઉપયોગના પ્રકારની વિગત તપાસી અરજદારને પાકુ બિલ અપાશે.