અમદાવાદ : અમદાવાદના પૂર્વમાં રખિયાલમાં આવેલી નૂતન ભારતી વિદ્યાલયમાં દીકરીનું લિવિંગ સર્ટિફિકેટ (LC) લેવા આવેલા વાલીએ સ્કૂલના શિક્ષક પર છરી વડે હુમલો કર્યો હતો. શિક્ષકે શુક્રવારે LC લેવા આવવાનું કહ્યું, જેથી વાલીએ ઉશ્કેરાઈને પહેલા શિક્ષકને લાફો મારી દીધો. ત્યાર બાદ શિક્ષકના માથે છરી મારી દીધી હતી. આ ઘટનાના સીસીટીવી ફૂટેજ પણ સામે આવ્યા છે, જેમાં વાલી શિક્ષકને ખિસ્સામાંથી છરી કાઢીને મારતા દેખાય છે. આ અંગે શિક્ષકે વાલી વિરુદ્ધ રખિયાલ પોલીસ સ્ટેશનમાં ફરિયાદ નોંધાવી છે.
પ્રાપ્ત રિપોર્ટ મુજબ, શહેરના રખિયાલ વિસ્તારમાં આવેલી નૂતન ભારતી વિદ્યાલયમાં વાલીએ સ્કૂલના શિક્ષક પર છરી વડે હુમલો કર્યો હોવાની ઘટના સામે આવી હતી. દીકરીનું LC લેવા માટે જ્યારે તેના વાલી હાજી મુસ્તાક અહેમદ શાળાએ આવ્યા હતા ત્યારે તેઓ શાળાના આચાર્યને મળ્યા હતા અને બાદ, આ બહાર ક્લાર્ક-કમ-શિક્ષકને મળ્યા હતા અને તેમને એલસી માટે વાતચીત કરી હતી તે દરમિયાન તેમણે શુક્રવારે LC લેવા માટે આવવા જણાવ્યું હતું. આથી વાલી હાજી મુસ્તાક ઉશ્કેરાઈ ગયો હતો.LC માટેની વાતચીતથી ઉશ્કેરાઈ ગયેલા શિક્ષકે શબ્બીર શેખને લાફો મારી દીધો હતો. આ દરમિયાન શબ્બીર શેખ પર હાજી મુસ્તાકે તેના ખિસ્સામાંથી છરી કાઢીને હુમલો કર્યો હતો. આ જોઈને શાળાનો સ્ટાફ ભેગો થઈ ગયો હતો અને બંનેને છૂટા પાડયા હતા.
શબ્બીર શેખને સારવાર માટે સિવિલ હોસ્પિટલમાં ખસેડવામાં આવ્યા હતા. હુમલાની ઘટનામાં તેમને માથાના ભાગે ઈજા પહોંચી હતી અને 7 જેટલા ટાંકા આવ્યા હતા. આ ઘટના બાદ શબ્બીર શેખે રખિયાલ પોલીસ સ્ટેશનમાં પણ ફરિયાદ નોંધાવી હતી. આ ઘટનાના સીસીટીવી ફૂટેજ પણ સામે આવ્યા હતા.જેમાં વાલી શિક્ષકને ખિસ્સામાંથી છરી કાઢીને મારતા દેખાય છે. રખિયાલ પોલીસે આ અંગે વધુ તપાસ હાથ ધરી છે.