અમદાવાદ : અમદાવાદ સહિત સમગ્ર રાજ્યમાં હુક્કાબાર પર પ્રતિબંધ હોવા છતાં પણ અમદાવાદના પોશ વિસ્તારમાં ગેરકાયદેસર રીતે હુક્કાબારો ચાલી રહ્યા છે. અમદાવાદના સરખેજ-મકરબા વિસ્તારમાં એસજી હાઇવે પર YMCA ક્લબની સામેમહમદપુરા રોડ પર આવેલા બ્રુ રોસ્ટ કાફેમાં ગેરકાયદેસર હુક્કાબાર ચાલતો હોવાની ચોંકાવનારી હકીકત સામે આવી છે.જુદી જુદી હર્બલ ફ્લેવરની જગ્યાએ નિકોટીનયુક્ત હુક્કા આપવામાં આવતા હોવાનું FSLની તપાસમાં બહાર આવતા સરખેજ પોલીસે કેફેના સંચાલક દિવ્યરાજસિંહ ચાવડા અને અબ્દુલ હામીદ બારી વિરુદ્ધ ગુનો નોધી તપાસ હાથ ધરી છે.
પ્રાપ્ત રિપોર્ટ મુજબ, સરખેજ પોલીસને ગત મે મહિનામાં એસજી હાઇવે પર મહંમદપુરા રોડ પર આવેલા બ્રુ રોસ્ટ કેફેમાં ગેરકાયદેસર રીતે હુક્કાબાર ચલાવવામાં આવતું હોવા અંગેની બાતમી મળી હતી. જેના આધારે પોલીસની ટીમ દ્વારા કેફેમાં દરોડો પાડવામાં આવ્યો હતો. ફેકેમાં ખુલ્લી જગ્યામાં ટેબલ પર હુક્કા મુકવામાં આવેલા હતા અને ત્રણ ગ્રાહકો હુક્કો પીતા હતા. પ્રતિ હુક્કા દીઠ 1000 રૂપિયા અને દોઢ કલાક બેસવાનો સમય આપવામાં આવતો હતો. પોલીસને કેફેમાંથી 24 હુક્કા અને 40 પાઇપો તેમજ અલગ અલગ ફ્લેવર મળી આવી હતી. આ તમામ મુદ્દામાલ કબ્જે કરી ફ્લેવરને તપાસ માટે FSLમાં મોકલી આપવામાં આવી હતી.
પોલીસ દ્વારા કેફેના ચાલક અબ્દુલ હમીદ અને દિવ્યરાજસિંહને બોલાવી તેનું નિવેદન લેતા તેઓ પોતે આ કેફેના માલિક હોવાનું અને અગાઉ પણ તેમની વિરુદ્ધ કેસ થયો હોવાનું કહ્યું હતું. પોલીસ દ્વારા મોકલવામાં આવેલા હુક્કા ફ્લેવર અંગે એફએસએલના રિપોર્ટ આવ્યો હતો જેમાં નિકોટીનનો ઉપયોગ થયો હોવાનું સામે આવ્યું હતું. ગેરકાયદેસર રીતે હુક્કાબાર ચલાવતા હોવાનું અને જુદા જુદા હર્બલ ફ્લેવરની જગ્યાએ નિકોટીનયુક્ત હુક્કો પીરસવા મામલે સરખેજ પોલીસે દિવ્યરાજસિંહ અને અબ્દુલ હામીદ વિરુદ્ધ ગુનો નોંધી તપાસ હાથ ધરી છે.
ઉલ્લેખનીય છે કે શહેરના એસજી હાઇવે અને સિંધુભવન રોડ પરના વિસ્તારોમાં આવા અનેક હુક્કાબારો ચાલી રહ્યા છે. હુક્કાબારો પર પ્રતિબંધ હોવા છતાં પણ નિકોટીનયુક્ત હુક્કાબારો ચાલી રહ્યા છે. સરખેજ પોલીસ દ્વારા અગાઉ પણ આવા હુક્કાબારો ઝડપી અને કેસ કરવામાં આવ્યો હોવા છતાં પણ ફરીથી હુક્કાબારો શરૂ થઈ ગયા છે.