અમદાવાદ : અમદાવાદ AMC માંથી લાંચના સમાચાર સામે આવ્યા છે. શહેરીજનોની મિલકતોના ટેક્સ માટેની આકારણી કરવા જતા AMCના પૂર્વ ઝોનના ટેક્સ વિભાગના કર્મચારીઓ દ્વારા લાંચ માંગવામાં આવતી હોવાની ફરિયાદ મળતા ACBએ છટકો ગોઠવીને એજન્ટની ધરપકડ કરી છે. આરોપી અમદાવાદ મ્યુનિસિપલ કોર્પોરેશનના નિવૃત કર્મચારી હોવાનું બહાર આવ્યું છે. ટેક્સ વિભાગના કર્મચારીઓની પણ સંડોવણી હોવાની શક્યતા છે. ACBની ટીમે 4000 રૂપિયા લેતા અંગે હાથ ઝડપી આ મામલે વધુ તપાસ હાથ ધરી છે.
પ્રાપ્ત રિપોર્ટ મુજબ, અમદાવાદમાં વિરાટનગર વિસ્તારના કોમર્શીયલ તેમજ રહેણાંક મકાનને લગતી આકારણીના કામોમાં વિરાટનગર વિસ્તારના રહીશો તેમજ વેપારીઓને જુદા-જુદા બહાના બતાવી તેમની પાસેથી ગેરકાયદેસર રીતે રૂ.1 હજારથી રૂ.10 હજાર સુધીની લાંચની માંગણી કરતા હોવાની ACB ને રજુઆત મળી હતી.જે રજુઆત આધારે ફરિયાદીનો સાથ- સહકાર મેળવી લાંચના ડીકોય છટકાનું આયોજન કરવામાં આવ્યું હતું. અમદાવાદ મ્યુનિસિપલ કોર્પોરેશનના નિવૃત્ત કર્મચારી ગોવિંદભાઈ પરમાભાઈ ડાભી (રહે. આરોહી એલીજીયમ, સાઉથ બોપલ, અમદાવાદ)ને લાંચના છટકા દરમ્યાન આરોપીએ ફરિયાદી સાથે હેતુલક્ષી વાતચીત કરી રૂ. 4000ની લાંચની માગણી કરી હતી. જેથી લાંચ લેવા માટે વિરાટનગર ખાતે આવેલી અંબિકા નગર સોસાયટીમાં લાંચ લેવા આવતા ACBએ રંગે હાથ ઝડપી લીધા હતા.
ACB ની ટીમ દ્વારા હાલ આ મામલે વધુ તપાસ કરવામાં આવી રહી છે મ્યુનિસિપલ કોર્પોરેશનના કોઈ કર્મચારી કે અધિકારીની આમાં સંડોવણી છે કે કેમ તેની પણ તપાસ થશે.અમદાવાદ મ્યુનિસિપલ કોર્પોરેશનમાં નોકરી કરતા નિવૃત્ત કર્મચારી નોકરી બાદ પણ આ પ્રકારના ભ્રસ્ટાચાર આચરે છે તો વર્તમાન કર્મચારીની સંડોવણીની ચોક્કસ શક્યતાઓ રહેલી છે, સમગ્ર મામલે યોગ્ય તપાસ કરવામાં આવે તો મ્યુનિસિપલ કોર્પોરેશનના કોઈ કર્મચારી કે અધિકારીની સંડોવણી બહાર આવે તેમ છે…