અમદાવાદ : GJ-01ની નંબર પ્લેટ માત્ર અમદાવાદમાં જ ફરતા વાહનોની નહીં સમગ્ર રાજ્ય, દેશમાં ફરતા વાહનોમાં શહેરની ઓળખ છે. જોકે ટૂંક સમયમાં આ નંબર પ્લેટને બંધ કરવામાં આવશે. શહેરની સુભાષ બ્રિજ રિજનલ ટ્રાન્સપોર્ટ ઓફિસ ટૂંક સમયમાં વાહનો માટે નવી રજિસ્ટ્રેશન સીરીઝ GJ-1A-AA શરૂ કરશે. વર્તમાન GJ-01 ડબલ-આલ્ફાબેટ સિરીઝ સમાપ્ત થવા જઈ રહી હોવાથી આ પગલું લેવામાં આવશે. આ બદલાવ શહેરની વાહન રજિસ્ટ્રેશન પ્રણાલીમાં એક મહત્ત્વનો ફેરફાર છે અને બાકી રહેલી વર્તમાન સીરીઝ પૂર્ણ થયા બાદ તે અમલમાં આવશે.
પ્રાપ્ત રિપોર્ટ મુજબ, વાહન વ્યવહાર કચેરીમાં બે આલ્ફાબેટની સિરીઝ પૂરી થયા બાદ નવા કોડ સાથે 0 ને બદલે આલ્ફાબેટ A નો ઉપયોગ કરવા રાજ્યના વાહન વ્યવહાર વિભાગને ફરમાન જારી કરાયું. હાલ અમદાવાદ અને સુરત શહેરમાં બે આલ્ફાબેટ નંબરની સિરીઝ પૂર્ણ થવાના આરે છે ત્યારે આગામી દિવસોમાં આ બંને શહેરને નવી સિરીઝ ત્રણ આલ્ફાબેટ સાથેની નવી સિરીઝ મળશે.જોકે તેનો અમલ થવામાં થોડો સમય લાગશે, કારણ કે હાલના ફોર્મેટ હેઠળ Q અને Z આલ્ફાબેટ સીરીઝ હજુ બાકી છે.વર્તમાન સમયમાં સુભાષ બ્રિજ આરટીઓ દર મહિને આશરે 5,000 ટુ-વ્હીલર અને 2500 ફોર-વ્હીલરનું રજિસ્ટ્રેશન કરે છે.
સૂત્રોના જણાવ્યા પ્રમાણે GJ-01 ડબલ આલ્ફાબેટ સીરીઝ પૂર્ણ થવા જઈ રહી છે, તેથી નવી સિરીઝ માટે વિનંતી કરવામાં આવી હતી. જેને ધ્યાનમાં રાખીને GJ-1એ સીરીઝ મળી ગઈ છે, પરંતુ તેનો અમલ થવામાં થોડો સમય લાગશે.હાલની સિસ્ટમ હેઠળ બાકી રહેલી સિરીઝમાં લગભગ 2,00,000 વાહનોનું રજિસ્ટ્રેશન થઈ શકે છે.