અમદાવાદ : અમદાવાદના કૌટુંબિક કંકાસમાં થયેલી માથાકૂટમાં ગોળીબાર થતાં સનસનાટી મચી ગઈ છે. તેમા પણ એક કે બે નહીં પણ ત્રણ રાઉન્ડ ગોળીબાર કરવામાં આવ્યો હતો. આ આખી સનસનાટીભરી ઘટના અમદાવાદના થલતેજ વિસ્તારમાં બની છે, આ ઘટનામાં કંકાસએ ગંભીર સ્વરૂપ ધારણ કરતાં બનેવીએ બહેનને લેવા આવેલા સગા સાળા પર ફાયરિંગ કર્યું હતું.ગંભીર રીતે ઘાયલ થયેલા સુધીરને તાત્કાલિક હોસ્પિટલમાં સારવાર માટે ખસેડવામાં આવ્યો હતો. આ સમગ્ર મામલે પોલીસે તપાસ અને કાર્યવાહી હાથ ધરી દીધી છે, જ્યારે ફાયરિંગના બનાવને કારણે સમગ્ર વિસ્તારમાં ખળભળાટ મચી ગયો હતો.
પ્રાપ્ત રિપોર્ટ મુજબ, પતિ મૌલિક પત્નીને નિયમિત રીતે માર મારતો હતો, જેના કારણે કંટાળીને પત્નીએ આ અંગેની જાણ પોતાના ભાઈ સુધીરને કરી હતી. પરિણામે, ભાઈ તેની બહેનને સાસરીમાંથી પોતાના ઘરે પાછી લઈ જવા માટે થલતેજ પહોંચ્યો હતો, તેના પછી સાળા અને બનેવી વચ્ચે ઉગ્ર બોલાચાલી થઈ હતી અને બનેવીએ આવેશમાં આવીને સાળા પર ગોળીઓ ચલાવતા ફાયરિંગ કર્યુ હતું.ફાયરિંગ દરમિયાન એક ગોળી સુધીરની ગાડીના કાચ પર અથડાતા કાચ તૂટી ગયો હતો. ઘટનાની વાત કરવામાં આવે તો મૌલિક ઠક્કર પોતાની પત્ની સાથે વારંવાર મારઝૂડ કરતો હતો. જેના કારણે તેની પત્નીએ પોતાના ભાઈ સુધીરને જાણ કરી હતી.
બહેનને લેવા માટે પહોંચેલા સુધીર અને મૌલિક વચ્ચે પહેલા વિવાદ થયો હતો અને પછી મામલો વધારે ઉગ્ર બન્યો હતો. ગુસ્સામાં આવેલા બનેવી મૌલિકે રિવોલ્વર કાઢી સાળા પર ફાયરિંગ કર્યું હતું. ઘટના થતાં જ આસપાસના લોકો ભેગા થઈ ગયા હતા અને સાળા સુધીરને સારવાર માટે હોસ્પિટલ ખસેડવામાં આવ્યો હતો. હાલમાં તેના સ્વાસ્થ્ય અંગે કોઈ જાણકારી આપવામાં આવી નથી.
આ મામલે બોડકદેવ પોલીસે મૌલિક ઠક્કર સાથે જીતુ ઠક્કર નામના અન્ય એક યુવક વિરુદ્ધ હત્યાના પ્રયાસ સહિતની વિવિધ ધારાઓ અને આર્મ્સ એક્ટ હેઠળ ગુનો દાખલ કર્યો છે. પોલીસે ઘટનાસ્થળેથી પુરાવા એકત્ર કર્યા છે અને આસપાસના સીસીટીવી ફૂટેજના આધારે આરોપીઓને ઝડપી લેવા માટે કાર્યવાહી શરૂ કરી છે. આ બનાવને પગલે થલતેજ વિસ્તારમાં તંગદિલીનો માહોલ સર્જાયો છે.