અમદાવાદ : અમદાવાદમાં ભારતનો સૌથી મોટો મોલ બનવા જઈ રહ્યો છે અને તેના માટે દુબઈના લુલુ ગ્રૂપે જમીન ખરીદી લીધી છે. ચાંદખેડા એરિયામાં લુલુ જૂથે 519 કરોડ રૂપિયામાં પ્લોટની ડીલ કરી છે.પ્લોટની ખરીદી માટે લૂલૂ ઈન્ટરનેશનલ શોપિંગ મોલ પ્રાઈવેટ લિમિટેડ દ્વારા 31 કરોડની સ્ટેમ્પ ડ્યૂટી ભરવામાં આવી છે.
પ્રાપ્ત રિપોર્ટ મુજબ, દૂબઈના લૂલૂ ગ્રૂપ દ્વારા કુલ 66,168 ચોરસ મીટરની જમીન ખરીદવા માટે મ્યુનિ.પાસેથી પ્લોટ ખરીદવામાં આવ્યાં છે. અમદાવાદ મ્યુનિસિપલ પાસેથી લૂલૂ ગ્રૂપ દ્વારા 381, 382, 383, 391 અને 396 એમ કુલ પાંચ પ્લોટ ખરીદવામાં આવ્યા છે. મ્યુનિસિપલ કોર્પોરેશનની 76/B ટીપી સ્કીમ પર આવનારા દિવસોમાં લૂલૂ ગ્રૂપ દ્વારા માટાપાયે મોલ બનાવવાની યોજના શરૂ કરવામાં આવશે.
મહત્વપૂર્ણ છે કે, વાઘબારસના દિવસે લૂલૂ ગ્રૂપ દ્વારા જમીનનો આ સોદો કરવામાં આવ્યો અને સ્ટેમ્પ ડ્યૂટીની ચૂકવણી સરકારને કરવામાં આવી હતી. સાબરમતી સબ-રજિસ્ટ્રારની ઓફિસના અધિકારીઓએ પુષ્ટિ આપી હતી કે આ અમદાવાદ શહેરમાં નોંધાયેલો સૌથી મોટો જમીનનો સોદો છે. જેમાં અત્યાર સુધીના એક જ સોદામાંથી સૌથી વધુ સ્ટેમ્પ ડ્યુટીની આવક પણ થઇ છે.
દુબઈ સ્થિત લુલુ ગ્રૂપ રિયલ એસ્ટેટના ક્ષેત્રમાં મોટું નામ ગણાય છે અને તે દુનિયામાં સૌથી મોટા મોલ બનાવવા માટે જાણીતું છે. લુલુ ગ્રૂપે અમદાવાદમાં પોતાનો સૌથી મોટો મોલ બનાવવાની જાહેરાત ઘણા સમય અગાઉ કરી હતી. પરંતુ હવે તે આ દિશામાં એક ડગલું આગળ વધ્યું છે અને ચાંદખેડા એરિયામાં જમીન ખરીદી છે.
રાજ્યના મહેસૂલ વિભાગના સૂત્રોના જણાવ્યા અનુસાર, ભૂતકાળમાં જમીનના મોટા સોદા સામાન્ય રીતે 300 કરોડ રૂપિયાથી 400 કરોડ રૂપિયાની વચ્ચે રહેતા હતા. જો કે, આ પહેલી વાર છે જ્યારે 500 કરોડ રૂપિયાથી વધુનો સોદો થયો છે.