અમદાવાદ : શહેરમાં ગુનાખોરીના બનાવો દિવસેને દિવસે વધી રહ્યા છે. અવારનવાર ચેઇન સ્નેચિંગની ઘટના સામે આવતી હોય છે, ત્યારે વધુ એક ચેઇન સ્નેચિંગની ઘટના સામે આવી છે. ચેઇન સ્નેચિંગનો આ બનાવ રાણીપ વિસ્તારમાં બન્યો, જ્યાં એક મહિલા પોતાના ઘરઆંગણે કચરો વાળી રહી હતી, ત્યારે બે અજાણ્યા શખ્સો બાઈક પર આવ્યા અને એડ્રેસ પૂછવાના બહાને મહિલાની ગળામાંથી સોનાની ચેઈન ખેંચીને ફરાર થઈ ગયા.
મળતી માહિતી મુજબ, અમદાવાદના રાણીપમાં રહેતા રંજનબેન જૈને રાણીપ પોલીસ સ્ટેશનમાં ફરિયાદ નોંધાવી છે કે, તેઓ રોનક પાર્ક સોસાયટીમાં રહે છે અને હાઉસવાઈફ છે. 22 ઓક્ટોબરના રોજ તેઓ સવારે 7 વાગ્યે ઘરની બહાર કચરો વાળતા હતા. આ દરમિયાન એક બાઈક ઉપર બે અજાણ્યા વ્યક્તિઓ આવ્યા હતા. બંને વ્યક્તિઓ રંજનબેન પાસે ઉભા રહ્યા હતા અને મોબાઈલમાંથી જોઈને રંજનબેન સાથે વાતચીત કરી રહ્યા હતા. આ દરમિયાન પાછળ બેઠેલા વ્યક્તિએ રંજનબેનના ગળામાં પહેરેલ સોનાની ચેન તોડી દીધી હતી અને બંને ચોરી કરીને ત્યાંથી નાસી ગયા હતા. રંજનબેને બૂમો પાડતા આસપાસના લોકો ભેગા થયા હતા. આ બનાવ અંગે રાણીપ પોલીસે બે અજાણ્યા વ્યક્તિ વિરુદ્ધ ગુનો નોધી તપાસ શરૂ કરી છે.
આખી ઘટના CCTV કેમેરામાં કેદ થઈ ગઈ છે, જેમાં બંને આરોપીઓ બાઈક પર આવી ચેઈન સ્નેચિંગ કરતા અને ત્યારબાદ ઝડપથી ભાગી જતા દેખાઈ રહ્યા છે. સામે આવેલા સીસીટીવી વીડિયોમાં દેખાઈ રહ્યું છે કે ગલીમાં માત્ર મહિલા જ દેખાઈ રહી છે, જે ઘરના આંગણામાં કચરો વાળી રહી છે. અચાનક જ ત્યાં બાઇક પર બે અજાણ્યા શખ્સો આવી ગયા અને મહિલા સાથે એડ્રેસ પૂછવાના બહાને વાતચીત કરવા લાગ્યા. મહિલા તેમણે રસ્તો બતાવી રહી છે, પણ અચાનક જ એક વ્યક્તિએ તેના ગળામાંથી ચેઇન ખેંચી લીધી અને પછી બંને બાઇક લઈને ફરાર થઈ ગયા. મહિલા હાથમાં સાવરણી લઈને કેટલાક ફૂટ સુધી તેમની પાછળ દોડી પણ ખરી.