અમદાવાદ: અમદાવાદના ગોતામાં આવેલા શ્રીફળ રેસિડેન્સીના ફ્લેટમાં દિવાળીની રજાઓમાં પરિવાર ફરવા ગયો હતો, ત્યારે ચોરે બંધ ફ્લેટમાં ઘૂસીને ચોરી કરી હતી. ચોરો ફ્લેટની સીડીમાં બાથરૂમના વેન્ટિલેશન પાસેના નાના દરવાજામાંથી એન્ટ્રી લઇને ઘરમાં ઘૂસ્યા હતા. જ્યાં ત્રણ મકાનમાંથી કુલ રૂ. 8.95 લાખની ચોરી કરી હતી. સોલા પોલીસે ફ્લેટમાં કામ કરનાર સફાઈકર્મી આરોપીને ઝડપી પાડી 6.34 લાખનો મુદ્દામાલ રિકવર કર્યો છે.
પ્રાપ્ત રિપોર્ટ મુજબ, મૂળ ઊંઝાના ઉનાવાના અરવિંદભાઈ પટેલ ગોતા વંદેમાતરમ્ રોડ પર શ્રીફળ એપાર્ટમેન્ટમાં રહે છે અને જાસપુરમાં પેવર બ્લોક બનાવવાની ફેક્ટરી ધરાવે છે. દિવાળીનો તહેવાર હોવાથી અરવિંદભાઈ ગત તા.21મીએ પરિવારજનો સાથે વતન ઊંઝા ગયા હતા. 26મીએ પરત આવ્યા ત્યારે તેમના બાથરૂમનો દરવાજો ખૂલ્લો હતો અને તેના કાચ પણ કાઢી નાખવામાં આવ્યા હતા.
ઘરમાં તપાસ કરતા ચોર રૂ. 6.10 લાખની મતાના 122 ગ્રામ સોનાના દાગીના અને રોકડ સહિત કુલ રૂ. 7.06 લાખની મતા ચોરી ગયો હતો. આ સાથે ફ્લેટમાં ભાડે રહેતા પીન્ટુભાઈ ચૌધરીના ઘરેથી પણ કુલ 24 હજાર અને અન્ય મકાનમાંથી રૂ. 1.65 લાખની ચોરી થઈ હતી. સોલા પોલીસે આ મામલે ગુનો નોંધી તપાસ કરતા કોઈ જાણભેદુ હોવાની થિયરી પર તપાસ કરી હતી. તપાસ દરમિયાન નિયમિત સફાઈકામ કરવા માટે આવતો યુવક જ ચોર નીકળ્યો હતો.
ઉલ્લેખનીય છે કે, સોલા પોલીસે સફાઈકર્મીની વિગતો મેળવીને ચાંદલોડિયા રેલવે ગરનાળા પાસેથી આરોપી અલ્પેશ (ઉ.21, રહે. રાણીપ)ને ઝડપી પાડી રૂ. 6.34 લાખનો મુદ્દામાલ કબજે કરી તપાસ હાથ ધરી છે. આરોપીએ આ સિવાય અન્ય કોઈ ગુનાને અંજામ આપ્યો છે કે કેમ અને તેની સાથે બીજા કોઈ સામેલ છે કે કેમ તે દિશામાં હાલ સોલા પોલીસે તપાસ શરૂ કરી છે અને તપાસ બાદ અન્ય ખુલાસા સામે આવશે.