ગાંધીનગર : ગુજરાત રાજ્ય માર્ગ વાહનવ્યવહાર નિગમ (GSRTC) દ્વારા મુસાફરોની સુવિધામાં ઉત્તરોત્તર વધારો કરવામાં આવી રહ્યો છે. હાઈ-ટેક બસો બાદ હવે નિગમે મુસાફરોની જઠરાગ્નિ તૃપ્ત કરવા માટે એક શાનદાર સુવિધાની જાહેરાત કરી છે. હવે ST બસના મુસાફરોએ હાઈવે પરની હોટલોના ભોજન પર નિર્ભર રહેવું નહીં પડે, કારણ કે નિગમ દ્વારા ‘On Demand Packed Food’ સેવા શરૂ કરવામાં આવી રહી છે.
પ્રાપ્ત રિપોર્ટ મુજબ, ગુજરાત રાજ્ય માર્ગ વાહનવ્યવહાર નિગમ (GSRTC) દ્વારા મુસાફર જનતાની સુખ સુવિધામાં વધારો થાય અને તે ઉચ્ચ ગુણવતા ની સારો નાસ્તો – આહાર મળે તેમજ આ સેવાનો મુસાફર જનતા દ્વારા વધુ ને વધુ લાભ લે તેવો પ્રયાસ કરાયો છે. સાથે જ, નિગમની પ્રતિષ્ઠામાં વધારો થાય તે માટે નિગમ દ્વારા જે પ્રમાણે રેલ્વે વિભાગમાં રનીંગ ટ્રેનમાં જમવાનું-નાસ્તો પ્રોવાઈડ કરવામાં આવે છે તે જ પ્રમાણે નિગમની એક્સપ્રેસ બસોમાં પણ સંચાલિત રૂટમાં પેસેન્જરોને ચાલુ બસે (FOOD ON BUS) પેક્ડ ફૂડ મળી રહે તે પ્રયાસ કરાયો છે.
નવીન પ્રોજેક્ટને હાલ પુરતા પ્રાયોગિક ધોરણે ફકત અમદાવાદ સીટી માટે જ “એક્સપ્રેશન ઓફ ઈન્ટરેસ્ટ” થી અલગ અલગ એજન્સીઓ પાસેથી ઓનલાઈન ભાવ મંગાવવામાં આવ્યા છે.હાલ પુરતાં પ્રાયોગિક ધોરણે અમદાવાદના પાલડી, સી.ટી.એમ, કૃષ્ણનગર, નરોડા પાટીયા, નેહરુનગર, રાણીપ, નારોલ ક્રોસ રોડ, સરખેજ, ઓઢવ ક્રોસ રોડ, અડાલજ,જશોદાનગર પોઈન્ટ / પિકઅપ સ્ટેન્ડ ડીલીવરી આપવામાં આવશે.
નિગમની આ નવી યોજના મુજબ, મુસાફરો હવે રેલવેની જેમ બસમાં પણ મનપસંદ ફૂડ ઓર્ડર કરી શકશે.
મુસાફરે ઓનલાઈન ફૂડ ઓર્ડર(ફૂડ ઓન બસ) મેળવવા માટે નિગમની ઓનલાઇન OPRS (Online Passenger Reservation System)
સીસ્ટમ પર બસ ટીકીટ ની સાથે સાથે ફૂડ પણ અગાઉ થી બુકિંગ કરી શકે છે.
મુસાફરી શરુ થયા બાદ જે સ્થળે ફૂડ મેળવવાનું હોય તે સ્થળ પહોચવાના 3 કલાક પહેલા ઓર્ડર કરવાનો રહેશે.
મુસાફર ઓનલાઈન એડવાન્સમાં ફૂડ બુકિંગ કરી શકે / મુસાફરી દરમ્યાન પણ ફૂડ ઓનલાઇન બુકિંગ કરી શકશે.
નક્કી થયેલ એજન્સી તમાકુ, બીડી, ગુટકા, નોન વેજ તેમજ પ્રતિબંધીત ચીજવસ્તુઓ બસમા સર્વ નહી કરી શકે.
અનિયમિતતા/ સમયસર ફુડ્સપ્લાય ન કરવાના કિસ્સામા રૂ.5000/- થી રૂ.10000/- દંડની જોગવાઇ કરવામાં આવેલ છે.