અમદાવાદ : અમદાવાદમાં પૂર્વના રિવરફ્રન્ટ ભરાતી રવિવારી બજાર એટલે કે ગુજરી બજાર 600 વર્ષથી પણ વધુ જૂની પરંપરા ધરાવે છે. રિવરફ્રન્ટ પ્રોજેક્ટ બાદ તેને વ્યવસ્થિત પ્લેટફોર્મ ફાળવવામાં આવ્યા હતા. ‘અહેમદશાહ ગુજરી એસોસિએશન’ (AGA) દ્વારા સંચાલિત આ બજાર માટેના ચોક્કસ 19 નિયમો છે, જેમાં પશુ-પક્ષીઓના વેચાણ પર સ્પષ્ટ પ્રતિબંધ મૂકવામાં આવ્યો છે.પરંતુ હવે આ બજારમાં બકરા અને ઘેટાના વેચાણ શરૂ થતાં અસંતોષ ફેલાયો છે.
પ્રાપ્ત વિગતો મુજબ, શહેરના જમાલપુર-ખાડિયા વિસ્તારના પૂર્વ ધારાસભ્ય ભૂષણ ભટ્ટે અમદાવાદ શહેરના પોલીસ કમિશનરને લેખિત રજૂઆત કરી છે. રજૂઆતમાં તેમણે જણાવ્યું છે કે, અગાઉ આ ગુજરી બજારમાં ક્યારેય પશુઓનું વેચાણ થતું નહોતું, પરંતુ છેલ્લા કેટલાક સમયથી અહીં બકરા અને ઘેટા વેચાતા જોવા મળી રહ્યા છે, જેના કારણે બજાર ધીમે ધીમે બકરામંડીનું સ્વરૂપ ધારણ કરી રહ્યું છે.
છેલ્લા કેટલાક રવિવારથી ગુજરી બજારના પ્રવેશદ્વાર અને તેની આસપાસના રસ્તાઓ પર મોટા પાયે બકરા અને ઘેટાના વેચાણ માટે વેપારીઓ ઉમટી રહ્યા છે.બજારના નિયત પ્લેટફોર્મ સિવાય રિવરફ્રન્ટના રસ્તાઓ પર પશુઓ લાવવામાં આવતા હોવાથી ટ્રાફિક અને અવરજવરની સમસ્યા વધી છે.રિવરફ્રન્ટ એ શહેરનું આકર્ષણ છે, પરંતુ પશુઓના કારણે ત્યાં ફેલાતી ગંદકી અને દુર્ગંધથી પર્યટકો અને સ્થાનિક રહીશોમાં ભારે રોષ જોવા મળી રહ્યો છે.
રિવરફ્રન્ટ પર ફરવા આવતા લોકોનું માનવું છે કે બકરામંડીના કારણે આ સ્થળનું સૌંદર્ય અને શિસ્ત જોખમાઈ રહી છે. ગુજરી બજારમાં એન્ટિક ચીજવસ્તુઓ, કપડાં અને ઘરવખરીના વેચાણની પરંપરા છે, પશુ બજારની અહીં કોઈ કાયદેસરની જોગવાઈ નથી.અચાનક ઉમટી પડતા પશુઓ અને ભીડના કારણે અકસ્માતનો ભય પણ સતાવી રહ્યો છે.
ભૂષણ ભટ્ટે વધુમાં જણાવ્યું છે કે આ બાબત અંગે સ્થાનિક મ્યુનિસિપલ કોર્પોરેશન તેમજ સ્થાનિક પોલીસ અધિકારીઓને પણ અગાઉ જાણ કરવામાં આવી હતી. છતાં હાલ સુધી કોઈ અસરકારક કાર્યવાહી ન થતાં હવે સીધા પોલીસ કમિશનર સમક્ષ રજૂઆત કરવામાં આવી છે.
પૂર્વ ધારાસભ્ય દ્વારા રજૂઆત સાથે સ્થળના ફોટા અને વીડિયો પુરાવા રૂપે મોકલવામાં આવ્યા છે અને આ મુદ્દે વ્યક્તિગત રસ લઈને યોગ્ય કાર્યવાહી કરવા વિનંતી કરવામાં આવી છે. રિવરફ્રન્ટ જેવા જાહેર અને પર્યટન સ્થળ પર આવા પ્રકારના વેપારથી કાયદો-વ્યવસ્થા, સ્વચ્છતા અને ટ્રાફિક સમસ્યાઓ ઊભી થવાની શક્યતા વ્યક્ત કરવામાં આવી છે. હવે આ મુદ્દે પોલીસ અને મ્યુનિસિપલ તંત્ર શું પગલાં લે છે તેના પર શહેરવાસીઓની નજર ટકી છે.