અમદાવાદ: શહેરમાં કાયદો અને વ્યવસ્થા જાળવી રાખવા માટે પોલીસે હાથ ધરેલા અભિયાનમાં એક મોટી સફળતા સાંપડી છે. અમદાવાદનો મોસ્ટ વોન્ટેડ છેલ્લા ઘણાં સમયથી પોલીસથી ભાગતો ફરતો આરોપી અઝહરની ધરપકડ કરવામાં આવી છે. વેજલપુર પોલીસ અને ઝોન-7 પોલીસની ટીમે બાતમીના આધારે કાર્યવાહી કરીને જુહાપુરા-વેજલપુર વિસ્તારમાંથી રીઢા ગુનેગારને ઝડપી પાડ્યો છે.
પ્રાપ્ત રિપોર્ટ મુજબ, વેજલપુર પોલીસ અને ઝોન-7 પોલીસની ટીમે ધરપકડ કરાયેલા આરોપી અઝહરનો ગુનાહિત ભૂતકાળ અત્યંત ભયાનક છે. તેની સામે હત્યાનો પ્રયાસ, ખંડણી અને મારમારી જેવા કુલ 21 જેટલા ગંભીર ગુનાઓ રાજ્યના વિવિધ પોલીસ સ્ટેશનોમાં નોંધાયેલા છે. ખાસ કરીને તે ગુજસીટોક (GujCTOC) જેવા કડક કાયદા હેઠળ પોલીસ ચોપડે વોન્ટેડ હતો. ધરપકડ દરમિયાન પોલીસને તેની પાસેથી રોકડ રકમ, એક વાહન અને શંકાસ્પદ વિદેશી ચલણી નોટો પણ મળી આવી છે, જે દિશામાં હવે વધુ તપાસ તેજ કરવામાં આવી છે.
અઝહરની ગુનાખોરીની મોડસ ઓપરેન્ડી પર નજર કરીએ તો, અગાઉ તેને કોર્ટ દ્વારા શરતી જામીન આપવામાં આવ્યા હતા. જોકે, સુધરવાના બદલે તેણે જેલની બહાર આવી ફરીથી ગુનાખોરીની દુનિયામાં પગ પેસારો કર્યો હતો. જામીનની શરતોનો ભંગ કરીને નવા ગુના આચરવા બદલ કોર્ટે તેના જામીન રદ કર્યા હતા. ત્યારથી તે ધરપકડથી બચવા માટે સતત નાસતો ફરતો હતો અને પોલીસ તેના દરેક સંભવિત ઠેકાણાઓ પર નજર રાખી રહી હતી.
આરોપી અઝહર માત્ર ગુનેગાર જ નહીં પણ સ્થાનિક વિસ્તારના વેપારીઓ અને રહેવાસીઓ માટે માથાનો દુખાવો બની ગયો હતો. તે પોતાની ધાક જમાવીને લોકો પાસેથી બળજબરીથી ખંડણી ઉઘરાવતો હતો. પોલીસ તપાસમાં સામે આવ્યું છે કે લોકો તેના ડરથી ફરિયાદ કરતા પણ ગભરાતા હતા. હાલમાં વેજલપુર પોલીસે આરોપીનો કબજો મેળવીને તેની સાથે અન્ય કોણ સંડોવાયેલું છે અને વિદેશી ચલણ ક્યાંથી આવ્યું તે દિશામાં પૂછપરછ શરૂ કરી છે.