અમદાવાદ : અમદાવાદમાં સાણંદ પોલીસે બાતમીને આધારે રેડ કરીને એક નિર્વાણા ગ્રીન્સના વિકેન્ડ હોમમાં ચાલતી દારૂની મહેફિલ ગત રાત્રે ઝડપી પાડી છે. પોલીસે 80 જેટલા યુવક અને યુવતીની અટકાયત કરવામાં આવી છે. આ તમામના મેડિકલ ટેસ્ટ રાતે જ કરવામાં આવ્યા છે. મહત્ત્વનું છે કે, પોલીસ આ રેડ અંગે તમામ સામે ફરિયાદ નોંધી મુદ્દામાલ જપ્ત કરીને વધુ કાર્યવાહી હાથ ધરી છે.
પ્રાપ્ત રિપોર્ટ મુજબ, સાણંદના ગોરસ સિમ નજીક આવેલા નિર્વાણા ગ્રીન વિકેન્ડ હોમમાં એક પ્રાઈવેટ બંગલોમાં એનિવર્સરીની પાર્ટીમાં દારૂની મહેફિલનું આયોજન કરાયું હતું. જે અંગે બાતમી મળી હતી. જે બાદ બોપલ પોલીસની ટીમે રેઇડ કરીને 80 જેટલા યુવક અને યુવતીની ધરપકડ કરી હતી. અહીં ફૂડ કાઉન્ટર ગોઠવવામાં આવ્યા હતા. આ ઉપરાંત 11 જેટલા ટેબલ પર પર કેક, હુક્કો અને દારૂ પીરસવામાં આવ્યો હતો.
પોલીસે રેઇડ કરતા જ મહેફિલમાં ભંગ પડ્યો હતો અને ત્યાં હાજર યુવક અને યુવતીઓમાં અફરાતફરી મચી ગઇ હતી. પોલીસ 80 જેટલા યુવક યુવતીની ધરપકડ કરીને પોલીસ સ્ટેશન લઈ આવી હતી અને ત્યાંથી સાણંદની સરકારી હોસ્પિટલ ખાતે મેડિકલ ટેસ્ટ માટે લઈ જવાયા હતા. દારૂની મહેફિલમાં અનેક મોટી હસ્તીઓ અને ધનાઢ્ય પરિવારના યુવક-યુવતીઓ છે.
આ અગાઉ ગત વર્ષે પણ સાણંદના ખાનગી રીસોર્ટમાં દારૂ પાર્ટી ઝડપાઈ, રિયલ એસ્ટેટ સાથે સંકળાયેલા લોકોની બર્થ ડે પાર્ટી હતી.જેમાં 80 લોકોઝડપાયા હતા, જેમાંથી 13 પુરુષ અને 26 મહિલાઓ નશાની હાલતમાં મળી આવ્યા હતા.
પોલીસ દ્વારા કરવામાં આવેલી આ કાર્યવાહીમાં કુલ 2,91,84,250 રૂપિયાનો મુદ્દામાલ જપ્ત કરવામાં આવ્યો છે. જપ્ત કરાયેલી વસ્તુઓની વિગત નીચે મુજબ છે:
દારૂનો જથ્થો: વિદેશી દારૂની 08 સીલબંધ બોટલ (કિંમત 43,550), 07 અડધી ભરેલી બોટલો અને 03 ખાલી બોટલો તેમજ દારૂ પીવા માટેના 70 કાચના ગ્લાસ.
હુક્કા અને ફ્લેવર્સ: રબ્બરની પાઇપવાળા 10 હુક્કા (કિંમત 10,000), હુક્કા ફ્લેવર્સના 08 પેકેટ અને 33 પ્લાસ્ટિકના ડબ્બા.
મોબાઈલ અને વાહનો: આરોપીઓ પાસેથી મળી આવેલા 74 મોબાઈલ ફોન (કિંમત 26,30,000) અને સ્થળ પરથી 22 લક્ઝરી ફોર-વ્હીલર ગાડીઓ (કિંમત 2,65,00,000) કબજે કરવામાં આવી છે.
આ મામલે પોલીસે આયોજક અમિત પચેરીવાલ અને અન્ય હાજર લોકો વિરુદ્ધ પ્રોહિબિશન એક્ટની વિવિધ કલમો જેવી કે 65(A)(A), 116(B), 66(1)(B), 75(A), 85(1)(3), 81, 84 અને 86 મુજબ ગુનો નોંધી આગળની તપાસ હાથ ધરી છે.